ШАХСОНИ ҲУҚУҚӢ ҲАМ БА ҲАБС ГИРИФТА МЕШАВАНД

Душанбе, 12 март. (АМИТ «Ховар», Лаззат Диловарзод).- Сессияи 24 – уми Маҷлиси Миллиии Маҷлиси Олии ҶТ ба моддаи 292 КҶҶТ тағйиру иловаҳои навро ворид кард, ки тибқи он шахсони ҳуқуқӣ барои пинҳон доштани миқдори калони андоз (350 ҳазор сомонӣ) ва махсусан калон (700 ҳазор сомонӣ)  ва саривақт насупоридани он ба ҷавобгарии ҷиноятӣ кашида хоҳанд шуд. -Дар сурати амалӣ шудани ин тағйирот мумкин аст миллионҳо сомонӣ ба буҷаи ҷумҳурӣ ворид гардад, зеро имрӯз танҳо онҳое аз андоз саркашӣ менамоянд, ки соҳибмансабанд ва ё ба мансабдорон наздикӣ доранд,- мегӯяд   коршиноси ҳуқуқӣ  Мӯҳтоҷ Қурбонов. Тибқи   тағйирот дар ин моддаи кодекси ҷиноятӣ ҳамчунин пешбинӣ шудааст, ки дар сурати сари вақт супоридани андози пинҳондошташуда, шахсони ҳуқуқӣ аз ҷавобгарии ҷиноятӣ озод карда мешаванд.