СОХТМОНИ ТЕРМИНАЛИ НАВИ ФӮРУДГОҲИ ДУШАНБЕ АЗ НАВ ОҒОЗ ШУД

Душанбе, 2 март. (АМИТ «Ховар», Мавзуна Бойева).  — Мувофиқи протоколи кории КВД «Фурудгоҳи байналмилалии Душанбе» ва ширкати сохтмонии SOFEMA–ALPHA AIRPORT корҳои сохтмонӣ дар терминали нави фурудгоҳи Душанбе аз нав оғоз гардиданд. Баъди ба мувофиқа расонидани ҳуҷҷатҳои сохтмонӣ ҷонибҳо ба озмоиши корҳои иҷрошуда ва санҷиши маводи истифодашуда бахусус семент ва арматураю бетон шурўъ карданд. Алҳол навъи бетони барои таҳкурсиҳо рехташуда мавриди санҷиш қарор дорад. Мувофиқи гуфти мутахассисон барои пурра санҷидани ҳолати бетони истифодашуда 28 рўз лозим аст. Мутахассисон иброз доштанд, ки ҷониби Тоҷикистон ва Фаронса ба хулоса омадаанд, ки барои бунёди таҳкурсии иншоот бетони тамғаи 200 истифода шавад. Муҳандиси «Софема групп» Тимофей Иванов иброз дошт: «Дар тамоми иншоот танҳо як маркаи бетон истифода намешавад, балки барои сутунпояҳо бетони тамғаи 200 ва баъдан дигар тамғаҳое, ки лоиҳа пешбинӣ кардааст, истифода хоҳем кард».                                    Бино ба иттилои сармутахассиси Пажуҳишгоҳи «Гипрострой» Асадулло Абдуллоев мувофиқи лоиҳа барои бунёди сутунпояҳои терминал бетони В-15 (аз сементи маркаи 400) пешбинӣ ва истифода шудааст. Аз рўи лоиҳа дар сохтмони сутунпояҳо бетони тамғаи В-15 ва барои дигар қабатҳои бино бетони тамғаи В-25 истифода карда мешавад. Асадулло Абдуллоев иброз дошт, ки пас аз шиносоӣ бо корҳои иҷрошудаи сохтмонӣ ва ҳуҷҷатҳои аз ҷониби Агентии сохтмон ва меъморӣ тасдиқшуда, ҷониби Фаронса маркаи бетоне, ки барои сохтмон Пажўҳишгоҳи «Гипрострой» пешниҳод намудааст қабул намуд. Асадулло Абдуллоев илова намуд, ки Пажуишгоҳи «Гипрострой» дар асоси меъёрҳои сохтмонии аз ҷониби Агентии сохтмон ва меъморӣ қабулшуда лоиҳаи терминали фурудгоҳи Душанберо омода намудааст. Меъёрҳои мавҷудаи сохтмонӣ танҳо бо тағир додани қонунҳои қабулшуда амалӣ карда мешаванд, ки дар шароити Тоҷикистон эҳтиёҷ ба тағйири қонунҳои  қабулшудаи сохтмонӣ нест. Маркаҳои семент ва класси бетони барои терминал пешбинишуда пурра ба меъёрҳои сохтмонии Тоҷикистон мувофиқанд, яъне барои сутанпояҳо бетони класси В-15 ва барои дигар деворҳои он класи В-25 истифода хоҳад шуд.