ҶАВОНОНРО ДАР АТРОФИ ИДЕЯҲОИ МИЛЛӢ ҶАМЪ МЕКУНАНД

Душанбе, 15 апрел. (АМИТ «Ховар», Жасмин Назарова). –13 апрел бо ибтикори Кумитаи ҳолатҳои фавқулодда ва мудофиаи граждании назди Ҳукумати Ҷумҳурии Тоҷикистон конфронси илмӣ дар мавзўи «Нақши ваҳдати миллӣ дар тарбияи ҳарби ватандустӣ ва истиқлолиятшиносӣ» дар якҷоягӣ бо Кумитаи иҷроияи ҳаракати ваҳдати миллӣ ва эҳёи Тоҷикистон, Китобхонаи миллии ба номи А. Фирдавсӣ ва Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон баргузор гашт. Тавре ба АМИТ «Ховар» муовини сардори раёсати корҳои тарбиявии ин Кумита, подполковник Музаффар Усмонов иттилоъ дод, дар конфронси мазкур роҷеъ ба мавзўҳои «Истиқлолият ва ваҳдат», «Мақоми ҷавонон дар таҳкими ваҳдат ва ризоияти ҷомеа», «Нақши китобҳо дар тарғиби истиқлолият ва ваҳдат» маърӯза шуда, мўҳтавои ҳамаи ин мавзўҳо ба таври гузориш баррасӣ шуд. Мавриди зикр аст, ки ҳадафи аслии ин конфронс муттаҳид сохтани ҷавонон дар атрофи идеяҳои миллӣ буда, дар он бештар ҷавонон аз ҳайъати хизматчиёни ҳарбии Кумитаи ҳолатҳои фавқулодда ва мудофиаи гражданӣ ҷалб шуданд.