ЧАРО МАЛАХ НЕСТ НАМЕШАВАД?

Қӯрғонтеппа, 19 апрел. (АМИТ "Ховар", Юсуфбек Беков).- Дар 15 ноҳияи    вилояти Хатлон малах   зиёда аз 20 гектар  замини корамро талаф додааст. Дар ин бора ба мухбири АМИТ   «Ховар» аз раёсати кишоварзии вилояти Хатлон хабар доданд.  Ҳамлаи малах дар ин вилоят бештар дар заминҳои кишти гандум ва пахта ба назар мерасад, ки аз рӯи ақидаи коршиносони кишоварзӣ,малахи ҳамлакарда , навъи Марокашӣ будааст,ки нисбати дигар малахҳо сахтҷон буда, дар гармо ва сармо тобовар мебошад.Ҳамлаи малах дар вилояти Хатлон ба заминҳои корам бори аввал набуда,  соли қабл низ ҳисороти зиёде оварда буд. Барои нест кардани малах ва дигар ҳашароти зараррасон Вазорати кишоварзӣ ба вилояти Хатлон  4 ҳавопаймо харидорӣ ва тақдим карда буд,ки бо сабаби набуди маблағ истифода намешаванд. Аммо коршиносони кишоварзи дар ин вилоят мегӯянд,ки сабаби афзоиши малах байни симхорҳои ду сарҳади ҳамсоя ба вилояти Хатлон, Афғонистон ва Ӯзбекистон мебошад,ки бинобар тоза накардани байни онҳо малах зиёд шуда тозакарданаш душвор мешудааст.