КӮМАКИ БАШАРДӮСТОНАИ РУСИЯ БА ТОҶИКИСТОН

Душанбе,  15 апрел. (АМИТ «Ховар», Фарангис  Раҳимова). —  Имрӯз  дар  ҳудуди   анбори  намояндагии  Муассисаи  ҷаҳонии  озуқаи  СММ  дар  Тоҷикистон   маросими  супоридани  кӯмаки  башардӯстонаи  Ҳукумати  Русия  ба  Тоҷикистон  баргузор гардид.  Кӯмаки  башардӯстона  аз  ҳисоби  саҳми  ихтиёрии   Русия  ба  хазинаи  Муассисаи   ҷаҳонии  озуқаи  СММ расонида шуд.  Дар  маросими  супоридани  кӯмаки  башардӯстона  сафири  Русия  дар  Тоҷикистон Юрий  Попов  иштирок  дошт. Вай  зикр  намуд, ки  кӯмакҳои  башардӯстонаи  мамлакаташ   асосан  барои  дастгирии  оилаҳои   камбизоат  ва   мусоидат  ба   амнияти  озуқаи   Ҷумҳурии  Тоҷикистон  пешбинӣ  карда  мешавад.  Сафир  афзуд, ки  ин  дафъа  ба  Тоҷикистон  дар  ҳаҷми  3839  тонна маводи  озуқа  кӯмаки башардӯстона   расонида шуд.  Ғайр  аз ин   ояндаи  наздик  ба  вилояти  Суғд  980 тонна  ва  ба  вилояти  Хатлон  1906 тонна  маводи озуқа   тӯҳфа  карда  мешавад. Ба  туфайли  чунин  кӯмак  талабагони  мактабҳои Тоҷикистонро  бо  хӯроки  гарм  муддати тӯлонӣ таъмин  кардан  мумкин  аст.  Инчунин  оилаҳои  камбизоат  ба  туфайли  кӯмаки  башардӯстонаи  мамлакати мо   беҳтару  хубтар  таъмин  карда  мешаванд,  гуфт  сафир.