КУРСИИ РАИСИ ПАЛАТАИ БОЛОИИ ПАРЛУМОН НАСИБИ КӢ МЕГАРДАД?

Душанбе, 20 апрел.(АМИТ «Ховар», Марзия Саидова).-23-уми апрели соли 2010 дар шаҳри Душанбе иҷлосияи нахустини Маҷлиси миллии Маҷлиси Олии Ҷумҳурии Тоҷикистон даъвати чорум баргузор мегардад. Дар назар аст, ки дар иҷлосияи нахустини палатаи болоии парлумони мамлакат масъалаҳои ташкилӣ,  ба мисли интихоби Раиси Маҷлиси  миллии Маҷлиси Олии Ҷумҳурии Тоҷикистон,  муовинони Раис, раисони Кумитаҳои Маҷлиси миллӣ мавриди баррасӣ қарор мегиранд. Бояд зикр кард, ки Маҷлиси миллии Маҷлиси Олии Ҷумҳурии Тоҷикистон ҳамчун палатаи болоии парлумони Тоҷикистон 10 сол муқаддам таъсис дода шуда, аз 34 аъзо иборат аст. Дар интихоботи 25 марти соли 2010 баргузор гардида, 25 нафар аз ҷониби Маҷлисҳои маҳаллии вакилони  халқ узви Маҷлиси миллӣ интихоб шуданд, ки 3 нафарашро занон ташкил медиҳанд. 8 нафари дигар бошад бо Фармони Президенти мамлакат ба узвияти Маҷлиси миллӣ таъин гардиданд. Нахустин Президенти Ҷумҳурии Тоҷикистон Қаҳҳор Маҳкамов узви якумраи Маҷлиси миллии Маҷлиси Олии Ҷумҳурии Тоҷикистон мебошад.