МАРКАЗИ НАВИ ҶАМЪИЯТӢ ДАРИ ХУДРО БОЗ КАРД

Душанбе, 17 апрел.(АМИТ «Ховар», Марзия Саидова).- Ба ифтихори таҷлили Рӯзи пойтахт 17 апрел дар маҳаллаи «Равшангарон»-и пойтахт Маркази сеошёнаи ҷамъяитӣ ба истифода супорида шуд, ки дар маросими он Раиси шаҳри Душанбе Маҳмадсаид Убайдуллоев, масъулини Мақомоти иҷроияи маҳаллии ҳокимияти давлатии шаҳри Душанбе, фаъолони пойтахт ва сокинони маҳалла иштирок намуданд. Раиси шаҳр сокинони маҳаллаи «Равшангарон»-ро бо Рӯзи пойтахт ва ифтитоҳи маркази нави ҷамъяитӣ табрик намуда, ба онҳо саломатӣ ва комёбиҳо ҷиҳати саҳм гузоштан дар ободонию пешрафти пойтахт орзу намуд. Бояд зикр кард, ки Маркази ҷамъиятӣ барои 200 ҷой  аз ҳисоби маблағҳои буҷаи шаҳр дар ин  маҳалла бунёд карда шуд. Маҳаллаи  «Равшангарон», ғолиби озмуни «Маҳаллаи беҳтарини шаҳри Душанбе-соли 2008» аст. Маркази ҷамъиятӣ, ки ба маблағи 1,8 миллион сомонӣ сохта шудааст аз толори тӯйгузаронӣ, ошхона, утоқҳои истироҳатию машваратӣ, нозири минтақавии корҳои дохилӣ, шӯъбаи бонки амонатгузорӣ, бунгоҳи тиббӣ,  Интернет-кафе, сартарошхона, дӯкони таъмири соату пойафзол, кошонаи ҳусн ва дигар намуди хизматрасониҳо иборат аст.