СОХТМОНИ ПЕЧҲОИ АЛОВӢ ДАР КОРХОНАИ СЕМЕНТБАРОРӢ

Душанбе, 20 апрел. (АМИТ «Ховар», Лаззат Диловарзод).- Ивази печи даврзанандаи  газӣ    корхонаи сементбарории шаҳри Душанбе то моҳи май бо сабабҳои техникӣ ба таъхир афтод. Боис ба ёдоварист, ки соли 2009 миёни корхонаи воҳиди давлатии «Тоҷиксемент» ва ширкати  «Ҷун — Хао» — и Ҷумҳурии Мардумии Чин оид ба ивази печҳои  газӣ    бо ангишт  созишнома ба имзо расонида шуда буд. Тибқи созишнома сохтмони печи якум, ки мебоист моҳи феврали соли ҷорӣ  мавриди истифода қарор мегирифт, бо сабабҳои техникӣ  мӯҳлати ба истифодабарии он то моҳи майи соли ҷорӣ дароз карда шуд. Санҷишҳои пешакӣ нишон доданд, ки истифода аз ангишт ду баробар хароҷоти сӯзишвории газиро кам хоҳад кард. Ивази як печ барои КВД «Тоҷиксемент» ба 7 млн. сомонӣ баробар аст, ки хароҷоташро дар ду моҳи аввали ба кор оғоз карданаш пӯшонида метавонад. Аз ин рӯ сохтани корхонаҳои сементбарории тавассути печҳои аловӣ — бо ангишт коркунанда,  барои Тоҷикистон ҳам қулай ва ҳам арзон аст.