ТАҶРИБАИ БЕЛОРУСИЯ БАРОИ ТОҶИКИСТОН МУҲИМ АСТ

Душанбе,  8 апрел. (АМИТ «Ховар»). —  Сафири фавқулодда  ва  мухтори  Тоҷикистон  дар  Белорусия  Қозидавлат  Қоимдодов  7  апрел  зимни  мулоқот  бо роҳбарияти  Кумитаи  иҷроияи  вилояти  Брест изҳор  намуд, ки  Тоҷикистон  ба равнақу  ривоҷи   муносибатҳои  мутақобилан  муфид  бо  Белорусия  дар  соҳаҳои  гуногун  манфиатдор  мебошад. Вай  зикр  намуд, ки  Тоҷикистон  дар  роҳи  истиқрор  ва  пешрафти   ҳаёти  иқтисодию  сиёсӣ  қарор  дорад,  дар  мамлакат  барномаҳои  бузурги   таъмини  истиқлолияти  энергетикӣ  амалӣ  карда  мешаванд. Барои  ин   вазифаҳои  бузургро  иҷро  кардан  зарур  аст.  Яке  аз  ин  вазифаҳо  барқарор  сохтани  соҳаи  тухмипарварӣ  ва  чорводорӣ  мебошад.  Ин  соҳаҳо  дар  Белорусия  ба таври  назаррас  тараққӣ  кардаанд, гуфт  Қ.Қоимдодов. Инчунин  Тоҷикистон  дар  бобати  ташкили   минтақаҳои  озоди  иқтисодӣ  аз  Белорусия  таҷрибаи  калон  омӯхта  метавонад. Зеро   чунин  минтақаҳо  дар  Белорусия  бештар  аз  10  сол  боз  фаъолият  доранд. Сафир  изҳор  намуд, ки  Тоҷикистон метавонад ба  Белорусия  ғайр  аз  нахи  пахтаю  алюминий  меваю  сабзавоти тару  тоза  фиристад.  Вай  пешниҳод  кард,  ки  ҳар  ду  ҷониб   аз  хизмати  миёнаравҳо  даст  кашида,  ҳамкории  мустақими  минтақаҳо ва  корхонаҳоро  ба  роҳ  монанд. Муовини  раиси   Кумитаи  иҷроияи   вилояти   Брест  Николай  Криветский  қайд  кард, ки   вилоят  айни  ҳол  бо  бештар  аз  100 мамлакат  муносибатҳои тиҷоратӣ  дорад.  Равобити  иқтисодию  тиҷоратии  вилояти  Брест бо  Тоҷикистон  алҳол   мувофиқи талабот  ривоҷ  наёфтаанд.  Маблағи  хариду  фурӯши  мол  дар  байни  онҳо  соли  2009  ҳамагӣ  7,5  миллион   доллари  ИМА – ро ташкил  дод. Н.Криветский  изҳори  умед  кард, ки  сафари  Қ.Қоимдодов  ба  вилояти  Брест  ва  мулоқотҳои  ӯ  ба рушди  муносибатҳои  мутақобилан  муфиди  Белорусия  ва  Тоҷикистон  мусоидат  хоҳанд кард.