ЗАРАРИ БОРУ МУСОФИРКАШОНӢ 10 МЛН. ДОЛЛАР

Душанбе, 22 апрел. (АМИТ «Ховар», Лаззат Диловарзод).- Ба гуфти раиси ширкати «Роҳи охани Тоҷикистон» Амонулло Ҳукуматулло дар семоҳаи аввали соли ҷорӣ зарари аз бору мусофиркашонӣ ба ширкати мазкур расонидашуда 10 млн. доллари амрикоиро ташкил медиҳад. Ба ин зарар ҳамчунин боздошти беасоси қатораҳои Тоҷикистон дар хоки Ӯзбекистон сабаб шудааст. Боиси тазаккур аст, ки боздошти қатораҳо боиси ҷарима шудани ширкати «Роҳи оҳани Тоҷикистон» аз тарафи соҳибони бору моли ба чумҳурӣ воридшаванда мегардад, ки андозаи ҷуброни он ба миллионҳо доллар баробар мегардад. Ба гуфти раиси ширкат, шумораи қатораҳои дар сарҳади Ӯзбекистон нигоҳ дошташаванда 1186 – то буда, 800 қатораи он барои вилояти Хатлон маводи сӯхт, техникаи соҳилмустаҳкамкунӣ, аз қабили булдозеру экскаваторҳо, ҳамчунин масолеҳи сохтмонӣ расониданӣ буданд. Бо вуҷуди муроҷиати чандинкаратаи ширкати «Роҳи оҳани Тоҷикистон » ба шӯрои байнидавлатии ИДМ дар ҳалли мушкилоти ба вуҷуд омада натиҷае ба даст наомадааст,- гуфт  А. Ҳукуматулло.