ҚОНУН БА ҶАЛБИ САРМОЯ МУСОИДАТ МЕКУНАД

Душанбе, 14 май. (АМИТ «Ховар», Лаззат Диловарзод).- Бино ба гуфти  раиси суди ноҳияи Синои шаҳри Душанбе Файзулло Раҷабов, қонуни ҶТ «Дар бораи авфи шаҳрвандон ва шахсони ҳуқуқии Ҷумҳурии Тоҷикистон бинобар қонунигардонии  баъзе маблағҳо», ки 25 – уми феврали соли ҷорӣ қабул гардид, қадами навбатие дар баланд бардоштани сатҳи иҷтимоии мардум мебошад. Ба гуфти Ф. Раҷабов, қонуни мазкур барои ҳар чӣ  бештар ба иқтисодиёти ҷумҳурӣ ҷалб намудани сармояи нафақат хориҷӣ, балки сармояи шаҳрвандони Тоҷикистон, ки дар бонкҳои хориҷӣ қарор доранд, мусоидат мекунад. -Аз тарафи дигар, қонуни мазкур танҳо василаи дигару иловагии ҳимояи ҳуқуқу манфиатҳои тоҷирону сармоягузорон, дастгирии давлатии соҳибкорӣ буда, моликияти шахсро аз таҷовузгарон ҳифз мекунад,- гуфт Файзулло Раҷабов.