«АМОНАТБОНК» БА ҲАШТЯК ФИНАЛ БАРОМАД

Душанбе, 11 май. (АМИТ «Ховар», Покиза Маҳмадбекова). — Чандест, ки бо ибтикори Кумитаи ҷавонон, варзиш ва саёҳии назди Ҳукумати Ҷумҳурии Тоҷикистон мусобиқаи футбол байни дастаҳои ташкилоту муассиса ва вазоратҳои кишвар дар пойтахти ҷумҳурӣ шаҳри Душанбе идома дорад. Сабқати мазкур бахшида ба 65-солагии солгарди Ғалаба ва Рӯзи ҷавонон бахшида шуда, рӯзи 23 июни соли 2010 ҷамъбаст мегардад. Тавре ба мухбири АМИТ «Ховар» хабар доданд, дастаи футболи Бонки давлатии амонатгузории Ҷумҳурии Тоҷикистон «Амонатбонк» то имрӯз се бозӣ гузаронида, миёни шариконаш дар гурӯҳ дастболо гаштаанд. Бозии охиринро футболбозони Амонатбонк бо дастаи Вазорати рушди иқтисод ва савдои ҶТ доир намуда, бо ҳисоби шаш бар як ғолиб омаданд. Муаллифони тӯбҳо Шамшод Ниятбеков капитан ва яке аз бозингарони моҳири даста Имомиддин Наимов буданд, ки каҳрамонони бозии номбурда маҳсуб меёбанд. Ш. Ниятбеков сарварии Шӯъбаи интиқоли маблағҳои Дастгоҳи марказӣ ва И. Наимов сарварии Идораи амалиётии филиали №04 дар ноҳияи Синои шаҳри Душанбе будаи Амонатбонкро ба ӯҳда доранд. Эшон дар баробари фаъолияти хуб дар Бонк дар корҳои ҷамъиятию варзишӣ низ фаъолона ширкат менамоянд. Бояд гуфт, ки бозии навбатии фуиболбозони Амонатбонк бо дастаи Раёсати хизмати давлатӣ рӯзи 15 май баргузор мегардад. Аҳли даста тасмим гирифтаанд бар ҳарифи навбатӣ низ дастболо гашта, шарафи бонкро дар зинаҳои боло ҳимоя намоянд.