ИДИ АТЛАС ДАР МАРКАЗИ ВИЛОЯТ

Хуҷанд,  4 май. (АМИТ «Ховар»,  Санавбар  Мақсудова). —  Дар  Қасри  фарҳанги   коҳи  Рӯдакӣ  таҳти унвони  «Атласи тоҷик – 2010»  озмуни  вилоятӣ  баргузор  гардид.  Дар  он  раиси  вилоят Қоҳир  Расулзода  ва  раиси  Кумитаи  занон  ва  оилаи  назди  Ҳукумати  ҷумҳурӣ  Сумангул  Тағоева  ширкат  варзиданд. Озмуни  мазкур  ҳар  сол  гузаронида  мешавад. Қ.Расулзода  дар  назди  ҳозирон  сухан  карда,   гуфт, ки  атлас  яке  аз  рамзҳои   фарҳанги  миллии  тоҷикон  мебошад. Дар Тоҷикистон  атласро  ҳанӯз  дар  асри 4 – уми  пеш  аз  милод  истеҳсол  мекарданд. Шаҳри  Хуҷанд дар  давоми  асрҳои  18 ва  19   яке  аз  марказҳои  истеҳсолкунандаи  матои  атлас  ба шумор  мерафт.  Аввали  асри  20  дар  ин  ҷо  қариб  3  ҳазор  дӯкони  атласбофӣ  амал  мекард, ки  бештар  аз  6000 коргар  дошт.  Мухбири  АМИТ «Ховар»  хабар  медиҳад, ки  ба  иштирокчиёни  ҷамъомад  қариб  300 намуди   либоси  аз атлас  дӯхташуда пешниҳод  карда шуд.