РУСИЯ ДАР БОРАИ МУҲОҶИРОН ҚОНУНИ НАВ ҚАБУЛ КАРД

Душанбе,  13 май. (АМИТ «Ховар»). —  Думаи  давлатии  Русия  дирӯз  дар  масъалаи  муҳоҷирони  меҳнатӣ  қонуни нав   қабул  намуд. Мувофиқи  он  тартиботи  вуруди  коргарони   муҳоҷир   ба  Русия, расмиёти  ба  кор  қабул  кардани онҳо,  инчунин  мутахассисони  баландихтисоси  хориҷӣ  ва  коргарони  муҳоҷири беихтисос  тағйир  меёбад.  Ҳадафи  қонун,  пеш  аз  ҳама  ҳимояи  бозори  дохилии  меҳнат  аз  теъдоди  зиёди  қувваи  кори  хориҷӣ  мебошад. Дар  робита  ба  қонун  «Дар  бораи  вазъи  ҳуқуқии  шаҳрвандони  хориҷи  дар  Федератсияи  Русия»  тағйирот  ворид  карда  мешавад. Акнун  коргарони  муҳоҷире, ки   аз  ҷумҳуриҳои  собиқи  шӯравӣ  бе раводид  ба  Русия  мераванд, бояд  барои   ба  кор   қабул шуданашон патент  гиранд.  Ин  талабот  ба  ҳамаи  коргарони  муҳоҷири  хориҷӣ,  аз  ҷумла,  хизматгорон, боғбонон,  бинокорон  ва  ғайра  дахл  дорад. Патент  дар  мақомоти  маҳаллии  ҳокимияти  иҷроия  дода  мешавад. Коргари  муҳоҷир  барои гирифтани он  бояд  ҳар  моҳ  1000 рубл  диҳад. Агар  ӯ  корашро   баъди  як  сол  давом  додан  хоҳад,  патенти нав  мегирад. Ғайр  аз  ин,  коргарони  муҳоҷир  бояд  барои  ҳуҷҷатҳояшон  сурат  гирифта,  ҳатман   нақши  ангушташонро  гузоранд.  Қонуни  нав  нисбати  мутахассисони   баландихтисоси  хориҷи  истифода бурда  намешавад, ки   дар  қаламрави  Русия  то  як  сол  кор  мекунанд.  Бо  чунин  мутахассисон  то се  сол  қарордоди  ҳамкорӣ   имзо  карда  мешавад. Мӯҳлати  қарордодро  баъдан  дароз  кардан  мумкин  аст.  Шумораи  вуруди   мутахассисони  варзида  ва  баландихтисос  ба  Русия  маҳдуд  карда  намешавад.  Мувофиқи  қонун  мутахассиси  варзида  ва баландихтисос  шаҳрванди  хориҷие  мебошад, ки   корфармо  ба  ӯ  дар  давоми  сол  камаш  2  миллион  рубл  маош  медиҳад. Тибқи  қонуни  нав   мутахассисони  баландихтисос   нақши  ангушташонро  дар  ҳуҷҷатҳои  дахлдор  намегузоранд.