ҲИСОБОТИ МИЛЛӢ ДАР БОРАИ РУШДИ ИНСОН

Душанбе,  7 июн. (АМИТ «Ховар», Бекназари  Абубакр). —  Вазорати  рушди  иқтисод  ва  савдои  Ҷумҳурии  Тоҷикистон  имрӯз  ҳамроҳи Муассисаи  рушди  СММ  ҳисоботи  миллиро   дар  бораи  рушди   инсон  дар  Тоҷикистон  пешкаши  хонандагон  гардонданд. Ҳисоботи  мазкур  асосан  ба  масъалаҳои  шуғли  аҳолӣ  бахшида  шудааст. Вазири   рушди  иқтисод  ва  савдои  Тоҷикистон  Фаррух  Ҳамралиев   зикр  кард, ки   имрӯз бо ташаббуси  Ҳукумати  мамлакат тадбирҳое  андешида  мешаванд, ки  ҳадафи онҳо  муҳайё  сохтани  ҷойҳои нави  кор   мебошад. Бояд  гуфт, ки  шуғли  аҳолӣ имрӯз  ҳам   аз  ҷумлаи  масъалаҳои  ҳалталаб  ба  шумор  меравад. Бинобар ин   ҳисоботи  имсола  ба  ҳамин  масъала бахшида  шуд.  Дар  ҳисобот   ба   мувофиқат  накардани   миқдор  ва  сифати  захираҳои  меҳнатӣ,  мушкилоти  муҳайё  намудани  ҷойҳои нави  кор,  муқаррар  намудани  роҳу  усулҳои  ҳисобу  китоби  воқеии   коргарон  ва  кормандон,  муайян  намудани   дараҷаи  воқеии  бекорӣ,   теъдоди  хеле  зиёди   коргарони  ғайрирасмӣ,   муҳоҷирати  дохилию  хориҷӣ,  меҳнати  бачагон  ва  таъмини  баробарҳуқуқии  занону  мардон  диққати  ҷиддӣ  дода  мешавад. Мудири  минтақавии Дафтари  Муассисаи   рушди  СММ  дар  мамлакатҳои  Аврупо  ва  ИДМ  Қорӣ Удовички  зикр  намуд, ки  шумораи  коргарони   ғайрирасмӣ  имрӯз  дар  Тоҷикистон хеле  афзудааст.  Ин  нишонаи  фаъолияти  ғайриқаноатбахши бозори  меҳнат  мебошад. Дар  ҷараёни  гузариш ба  муносибатҳои бозаргонӣ,  ҳаҷм,  сохтор   ва  хусусияти  коргарони  ғайрирасмӣ,  инчунин  нақши он  дар  иқтисодиёт ба таври  ҷиддӣ  тағйир  ёфт.  Бинобар  ин  дар  ҳисобот  хулоса бароварда  мешавад, ки Тоҷикистон  имрӯз  ба таҳияи  барномаи   доманадори  миллӣ эҳтиёҷи  калон  дорад. Дар   барнома  бояд  сиёсати   даромад  ва  музди  кори   коргарон  дар  давоми  муддати  тӯлонӣ  таҷдиди назар  карда шавад.  Муассисаи  рушди  СММ   ҳамроҳи  Вазорати  корҳои  хориҷии  Ҷумҳурии  Тоҷикистон  лоиҳаи  Ҳисоботи  миллиро   дар  бораи   рушди  инсонӣ  тартиб  дод, ки  ба  мувофиқати   барномаи   рушди   имкониятҳои  инсонӣ   ва   беҳтар  сохтани огоҳии  мардум   аз   проблемаҳои рушди  инсон  бо  роҳи  чоп  кардани   масъалаҳои  марбута   дар  ин  мавзӯъ   равона  карда шудааст. Тоҷикистон  айни  ҳол  дар  феҳрасти  байналмилалии  рушди  инсонӣ дар  миқёси  ҷаҳон  ҷои  127 – умро  ишғол  менамояд.   Ин  аз  бисёр  ҷиҳат  ба   нигоҳ  доштани   меъёрҳои баланд  дар  соҳаи  маориф   ва   умри  нисбатан  дарози   мардон  ва  занони  коргар   вобаста  мебошад.  Бо  вуҷуди  ин  кам будани   даромад   ба  ҳар  сари  аҳолӣ  ба  шӯҳрати  мамлакат  дар  феҳрасти  мазкур  таъсири  манфӣ  мерасонад.