АЗ СОЙҲОИ ДЕҲАҲОИ ҶИНДАРА, ХИЛИСОЙ ВА РОҒОБА СЕЛ ФАРОМАД

Душанбе, 25 июн. (АМИТ «Ховар», Жасмин Назарова). — Рӯзи 24 июни соли равон бар асари боришоти боронҳои шиддатнок дар ҷамоати деҳоти Хонақоҳи кӯҳии ноҳияи Ҳисор аз сойҳои деҳаҳои Ҷиндара, Хилисой ва Роғоба сел омада, ба роҳҳои мошингарди байни деҳа ва заминҳои наздиҳавлигии шаҳрвандон зарар расонид. Тибқи маълумоти маркази матбуоти Кумитаи ҳолатҳои фавқулодда ва мудофиаи граждании назди Ҳукумати ҶТ, айни замон, дар ҷои ҳодиса хадамотҳои дахлдори мудофиа граждании ноҳия барои бартарафсозии ҳолати фавқулоддаи рухдода фаъолият доранд.