ИҶОЗАТИ РУСИЯ БА ВОРИДОТИ МЕВАИ ХУШК АЗ ТОҶИКИСТОН

Душанбе,  15 июн. (АМИТ «Ховар»). —  Роҳбари Хадамоти   назорати  давлатии ҳифзи  ҳуқуқи  истеъмолкунандагони  Русия,  сардухтури  давлатии  санитарии  ин  мамлакат Геннадий  Онишенко  хабар  дод, ки   қарори  манъи   фиристодани  меваи  хушк  ва  чормағз  аз  Тоҷикистон  бекор  карда  мешавад. Ба  қавли  ӯ,  дар  ин  бора  ба  муассисаҳои  минтақавии  санитарӣ  рӯзи  сешанбе дастур   дода  хоҳад  шуд. Г.Онишенко   зикр  кард, ки  қарори  мазкур  амалан  рӯзи  панҷшанбе  бекор  карда  мешавад. Хадамоти  санитарии  Русия  ворид  сохтани  меваи  хушк  ва  чормағзро  аз  Тоҷикистон  ба  Русия  аввали  моҳи  май  манъ  карда  буд.  Сабаби  қабули  қарори  мазкур   паҳн  гардидани  бемории  фалаҷи  ҳароммағз  дар  Тоҷикистон  буд. Ба ин  бемории  вазнин  пеш  аз  ҳама  бачагони  хурдсол  гирифтор  мешаванд. Духтурони  Русия  аз  он  изҳори ташвиш  карда буданд, ки  бемории  фалаҷи  ҳароммағзи  аз  Ҳиндустон  ба  Тоҷикистон  овардашуда,   ба  воситаи   меваи  хушк  ва  чормағз  дар  қаламрави  Русия  паҳн  мегардад.  Зеро  мардум  одатан   меваи  хушкро   ношуста  истеъмол  мекунанд. Бояд  гуфт, ки  меваи  хушк  ба  Русия  асосан  аз  вилояти  Суғд  ворид  карда  мешавад. Ҳол  он  ки  дар  вилояти  мазкур   ягон  бемори  гирифтори  фалаҷи  ҳароммағз ба  қайд  гирифта нашудааст. Қайд  карда  мешавад, ки  меваҳои  хушки  то  қабули  қарори  манъи  вуруди  онҳо  дар  сарҳад   мусодирашударо  ба  воситаи  корхонаю  муассисаҳое  фурӯхтан  мумкин  аст, ки   онҳоро  бо  истифодаи  гармӣ  безарар  гардонда  тавонанд. Г.Онишенко   изҳор  намуд, ки   рӯзҳои  наздиктарин  масъалаи   бекор  кардани   маҳдудиятҳои  дигар,  аз  ҷумла,  ба  Русия  овардану  бурдани  бачагони  хурдсол  низ  баррасӣ  карда  мешавад. Тибқи  қарори  мазкур  ҳамаи  ҳавопаймоҳо  ва  қатораҳои  роҳи  оҳани  аз Тоҷикистон  ба  Русияомада  низ  тафтиш  карда  мешуданд.  Хадамоти  давлатии  санитарии   Русия  ба шаҳрвандони  мамлакат   тавсия  дода буд, ки  зимни  сафар ба  Тоҷикистон аз  бурдани  фарзандонашон  худдорӣ  кунанд. Г.Онишенко чанд  рӯз  пеш  хабар  дод, ки  дар  Русия  чор  ҳодисаи  аз  Осиёи  Марказӣ ба  қаламрави  мамлакат  ворид  гардидани  шахсони  бемори гирифтори фалаҷи  ҳароммағз  ба  қайд  гирифта  шуд.   Аз  ҷумла,  яке  аз  ин  беморон  вафот  кард. Беморони  дигар  дар  вилоятҳои  Иркутск, Челябинск ва Екатеринбург ба  қайд  гирифта шудаанд. Шахси  аз бемории  фалаҷи  хароммағз  дар   Екатеринбург  вафоткарда шаҳрванди  Ӯзбекистон мебошад.  Г.Онишенко  изҳор  намуд, ки  дар  Тоҷикистон  маъракаи  доманадори  дорудиҳӣ  ба бачагон  гузаронида шуд. Дар  натиҷа  шумораи  беморон ба таври  назаррас  кам   гардид.