ИЗҲОРОТИ ВКХ ТОҶИКИСТОН

Душанбе,  16 июн. (АМИТ «Ховар»,  Наталя  Михайлова). —  «Вазорати  корҳои  хориҷии  Ҷумҳурии  Тоҷикистон изҳороти  чанд  рӯз  пеш  дарҷнамудаи   муовини  раиси  Хадамоти  давлатии  амнияти  миллии  Қирғизистон Қубат  Бойболовро  дар  бораи  иштироки  гурӯҳи одамони  аз  Тоҷикистономада дар  бетартибиҳои  оммавӣ  дар  қисмати  ҷанубии  ин  мамлакат   қотеъона рад  менамояд.  ВКХ  Тоҷикистон таъкид  мекунад, ки  террористон  ватан  ва  миллат  надоранд», —  гуфта  мешавад  дар  изҳороти  роҳбари  раёсати  иттилооти  ВКХ  Тоҷикистон  Давлат  Назриев.  «Вазорати  корҳои  хориҷии  Ҷумҳурии  Тоҷикистон  аз   муташанниҷ  гардидани  вазъи  ҷамъиятию  сиёсии қисмати  ҷанубии  Қирғизистон  изҳори ташвиш  намуда,  тарафҳои   муқобил  ва  мансабдорони   масъулро  даъват  мекунад, ки   барои  қатъи  муқовимат  то  ҳадди  имкон  бештар  кӯшиш  ба  харҷ  дода,   барои   ҳалли  мусолиматомези   проблемаҳои  бамиёномада  шароит  муҳайё  созанд. Роҳбарияти  ҳукумати  муваққатии  Қирғизистон   метавонад  изҳороти  беасос  ва  бӯҳтономези  баъзе  аъзои  ҳукумат  ва  кормандони онро  пешгирӣ  намояд». Дар  изҳорот  омадааст, ки  террористон берун  аз  ҳудуди  минтақаи  Осиёи  Марказӣ  дар  пойгоҳҳои  низомии  созмони  террористии  Алқаёда  машқ  мекунанд ва дар  байни онҳо  шаҳрвандони  мамлакатҳои  Осиёи  Марказӣ  низ  ҳастанд.  Одатан  чунин   террористон  баъдан  барои   амалӣ  сохтани  фаъолияти  харобкорӣ  ба ин  ё он  давлат  фиристода  мешаванд. Дар  ин  бора ҳодисаи  нобуд  сохтани  ду террорист – сокинони  собиқи  шаҳри  Исфара  дар  мавзеи  Майхӯра  равшан  шаҳодат  медиҳад. Тавре  ки  маълум  аст  онҳо  ба  намояндагони  мақомоти  муҳофизи  қонуни  Тоҷикистон  муқовимати  мусаллаҳона  нишон  доданд ва дар  натиҷа  нобуд  карда шуданд,   гуфта  мешавад  дар  изҳорот. Д.Назриев  таъкид  мекунад, ки  Тоҷикистону  Қирғизистон  муносибатҳои неки  ҳамсоягӣ  доранд.  Мо  умедворем, ки  вазъияти  муташанниҷи  дар  мамлакати  бо  мо дӯсту  бародар  ва  шарики  стратегии  мо рухдода дар  кӯтоҳтарин  муддат  бартараф  карда  шавад,  менависад  Д.Назриев. Ёдовар  мешавем, ки  коменданти  вилояти  Ҷалолобод   ва  муовини  аввали   роҳбари  Хадамоти   амнияти  миллии  Қирғизистон  Қубат  Бойболов  14  июн изҳор  карда буд, ки  дар бетартибиҳои  дар  қисмати  ҷанубии  мамлакат  рухдода   гурӯҳҳои  махсуси   тайёркардашудаи   шаҳрвандони  Тоҷикистон  низ  иштирок  доранд. Ба  қавли  Қ.Бойболов,   дар   маҳалҳои  гуногун  мошинҳои  дорои  шишаҳои  сиёҳ  пайдо  шуда,  ба  сӯи  намояндагони  ҳар  ду  миллат  мувофиқи тартиби  муайян  оташ  мекушоянд.  «Онҳо  гурӯҳҳои   махсус  тайёркардашудаи   шаҳрвандони  Тоҷикистон  мебошанд, ки  бо  ҳукми  тақдир  қашшоқу  бенаво  гардидаанд.  Хешу таборони   хонаводаи Боқиевҳо, ки  аз  сари  ҳокимият   дур  карда шудаанд,   онҳоро   киро  карда,  ба  муқобили  миллати  қирғиз   равона  месозанд.  Мо  дар  ин  бора  далелҳои  раднашаванда  дорем,  инчунин   худи  дастгиршудагон  ҳам  иқрор  гардиданд.  Аз  ҷумлаи террористон  чанд  нафар  дастгир  карда шудаанд,  нисбати онҳо  парвандаҳои  ҷиноӣ  кушода шудааст,  дафтари  аъмоли онҳо  мувофиқи  қонун  тафтиш  карда  мешавад.  Мо  дар  ин  бора   рӯзҳои наздик  ба  аҳли  ҷомеа  хабар  хоҳем  дод», —  гуфт  Қ.Бойболов.