КӮДАКОНИ ЗАРАРДИДАГОНРО БА ЛАГЕР МЕБАРАНД

Кӯлоб, 10 июн. (АМИТ «Ховар», Сулаймон Холов).-  Бо дастгирӣ аз иқдоми  Сарвари давлат ҷиҳати таъмини истироҳати тобистонаи фарзандони оилаҳои камбизоат, ки бар асари фалокати табиӣ аз манзили зист маҳрум гардидаанд, 150 нафар кӯдакон аз шаҳри Кӯлоб ба истироҳатгоҳи «Шимкент»-и ноҳияи Ҳисор фиристода шуд. Ин мавсим аз 1 ҳазору 340 нафар кӯдакони оилаҳои зикршуда 400 нафар дар лагерҳои беруназшаҳрӣ, 200 нафар дар истироҳатгоҳҳои ҷумҳуриявӣ ва боқимонда дар назди 14 муассисаи таълимии шаҳри Кӯлоб дар се баст ба истироҳат фаро гирифта мешавад. Дар истироҳатгоҳҳои ҷумҳуриявӣ барои дар се баст ба истироҳату солимгардонӣ  фаро гирифтани наврасон шароити зарурӣ муҳайё гардида, дар назар аст, ки боз 200 нафар кӯдакони оилаҳои мазкур аз ҳисоби федератсияи итифоқҳои касабаи Тоҷикистон ба истироҳатгоҳҳои Варзобу Ромит фиристода шаванд. Ҳамзамон,  мақомоти иҷроияи ҳокимияти давлати ва шӯъбаи маорифи шаҳри Кӯлоб дар истироҳатгоҳи «Шарора»-и ноҳияи Мӯъминобод низ ин мавсим  шумораи муайяни наврасонро ба истироҳат фаро мегиранд.