КӮМАКИ ИЛМИИ ОЛИМОН БА БОҒПАРВАРОН

Душанбе, 11 июн. (АМИТ «Ховар», Лаззат Диловарзод).- Бино ба гуфтаи президенти Академияи илмҳои  кишоварзӣ, академик Ҳукматулло Аҳмадов, олимони Пажӯҳишгоҳи боғпарварию  сабзавоткории академияи мазкур, доир ба амалӣ намудани «Барномаи  мақсадноки давлатии рушди соҳаи боғутокпарварӣ, тадриҷан  зиёд намудани истеҳсоли меваю ангур ва парвариши дарахтони мевадиҳанда ва ҳамешасабз дарҶТ барои солҳои 2007 -2010» ва Фармони Президенти ҶТ оид ба бунёди 46901 гектар боғу токзор дар давоми солҳои 2010 – 2014 барои парвариши ниҳолҳои баландсифати навҳои ҷавобгӯи талаботи бозор корҳои зиёдро анҷом доданд. Оид ба иҷрои барномаи мазкур кормандони Пажӯҳишгоҳ бо ноҳияҳои Ёвон, Носири Хисрав, Шаҳритус, Қубодиён, Ҷиликӯл, Қумсангир, Панҷ, Ҷалолиддини Румӣ, Вахш, Данғара ва Темурмалики вилояти Хатлон шартномаҳои  ҳамкорӣ ба имзо расониданд. Ин тарзи ҳамкорӣ имкон медиҳад, ки дар барқарорсозии боғу токпарварӣ, ки дар асоси илми муосир рушд ёфтааст, барномаи мазкур амалӣ гардад  ва боғутокпарварон манфиати зиёд ба даст оранд.