ПАРЛУМОН ҚОНУН «ДАР БОРАИ ПАРКИ ТЕХНОЛОГӢ»-РО ҚАБУЛ ХОҲАД КАРД

Душанбе, 14 июн.(АМИТ «Ховар», Марзия Саидова).-14 июн таҳти раёсати раиси палатаи поёнии парлумони мамлакат Шукурҷон Зуҳуров  ҷаласаи навбатии  Шӯрои Маҷлиси намояндагони Маҷлиси Олии ҷумҳурӣ баргузор гардид. Дар ҷаласаи Шӯро лоиҳаи Қонуни конститутсионии Ҷумҳурии Тоҷикистон «Оид ба ворид намудани тағйирот  ба Қонуни конститутсионии Ҷумҳурии Тоҷикистон «Дар бораи Маҷлиси Олии Ҷумҳурии Тоҷикистон», лоиҳаи Қонунҳои Ҷумҳурии Тоҷикистон «Дар бораи Парки технологӣ», «Оид ба  ворид намудани тағйирот ба Қонуни Ҷумҳурии Тоҷикистон «Дар бораи танзими анъана  ва ҷашну маросимҳо дар Ҷумҳурии Тоҷикистон», «Дар бораи ӯҳдадории умумии ҳарбӣ ва хизмати ҳарбӣ», «Дар бораи ворид намудани тағйиру иловаҳо ба Кодекси мурофиавии ҷиноятӣ ва Кодекси ҷиноятии Ҷумҳурии Тоҷикистон», «Дар бораи ворид намудани тағйирот   ба Кодекс барои иҷрои ҷазои ҷиноятии Ҷумҳурии Тоҷикистон» мавриди баррасӣ қарор гирифтанд. Аз Хадамоти матбуоти Маҷлиси намояндагон ба АМИТ «Ховар» иттилоъ доданд, ки дар ҷаласаи Шӯро ҳамчунин, Созишномаҳо  оид ба тартиби  ташкил ва гузаронидани  машқҳои муштараки  зиддитеррористии  давлатҳои аъзои Созмони Ҳамкории Шанхай /СҲШ/, Созишнома оид ба ҳамкорӣ  байни  ҳукуматҳои  давлатҳои аъзои СҲШ дар мубориза бо гардиши ғайриқонунии яроқ, лавозимоти ҷангӣ ва моддаҳои тарканда, дар хусуси Конвенсияи байналмилалӣ дар бораи ҳифзи мероси  ғайримодии фарҳангӣ муҳокима шуданд.