ШӮРОИ АМНИЯТИ СММ МУҶОЗОТИ МУҚОБИЛИ ЭРОНРО МАЪҚУЛ ДОНИСТ

Душанбе,  11 июн. (АМИТ «Ховар»). —  Шӯрои  амнияти  СММ  9  июн  бо  аксарияти  овозҳо  ҷорӣ  намудани  муҷозоти  иловагиро   нисбати  Эрон  маъқул  донист. 12  намояндаи  мамлакатҳои  аъзои  Шӯрои  амният  ба  тарафдории  ҷорӣ  кардани  муҷозот  овоз  дод.  Ҳайати   Бразилия  ва  Туркия   ба  муқобили  ҷорӣ  кардани  муҷозот  овоз  доданд.  Намояндаи  Лубнон  аз  овоздиҳӣ  худдорӣ  намуд. Ба  қавли  намояндаи   Бразилия,  тасдиқи   қатъномаи  ҷорӣ кардани  музоҷот  ба  муқобили  Эрон  дар  шароити  имрӯза  хавфи  ҷиддӣ  дошта  метавонад.  Вай  қайд  кард, ки  Бразилия,  Туркия  ва  Эрон  дар  бораи   мубодилаи   захираҳои  уран  созишнома  имзо  кардаанд. Дар  чунин  шароит  ба  ҷорӣ  намудани  муҷозоти  иловагӣ зарурат  боқӣ  намемонад. Ба  қавли  намояндаи  Туркия  тасдиқи  қатъномаи  ҷорӣ  кардани  муҷозоти  иловагӣ  ба   амалӣ  сохтани  тадбирҳои  дипломатӣ  дар  масъалаи   барномаи  ядроии  Эрон  таъсири  манфӣ  мерасонад. Шӯрои  амният ҳамаи  давлатҳои  аъзои  СММ – ро  даъват  кард, ки  аз  ҳамлу  нақли   сармояи  бонкҳои  Эрон   дар  бонкҳои  худ  сарфи  назар  кунанд. Муаллифони  қатънома —  ИМА, Фаронса, Олмон ва  Британияи  Кабир  ташкили   гурӯҳи байналмилалии   тафтиши  киштиҳои  боркаши  Эронро   ба  нақша  гирифтаанд.  Дар  қатънома  рӯйхати  навъҳои  иловагии  аслиҳа  оварда  мешавад, ки   фурӯши онҳо  ба  Эрон  манъ  карда  шудааст. Аз  рӯи  маълумоти  Агентии  байналмилалии  энергияи  атом,  Эрон  талаботи  қарору  қатъномаҳои роҳбарияти  агентӣ ва  Шӯрои  амнияти  СММ – ро  иҷро намекунад. Илова бар  ин  Эрон  фаъолияти  худро  дар    бобати  тоза  кардани  уран  идома  медиҳад. Ба  қавли  мутахассисон  захираи   урани тозакардашуда  дар  Эрон  айни  ҳол  2,43  тоннаро  ташкил  медиҳад. Инчунин  дар  мамлакат 8,528  ҳазор   дастгоҳи  тоза  кардани  уран  истифода бурда  мешавад. Қарори  Шӯрои  амнияти  СММ  дар  бораи  ҷорӣ  кардани  муҷозот  ба  муқобили  Эрон  дар  вақте  қабул  гардид, ки  Президенти  Эрон  Маҳмуд  Аҳмадинажод  дар  пойтахти  Тоҷикистон  қарор  дошт.  Вай   қарори  Шӯрои  амниятро  ба  куллӣ  беасос ва  бефоида  номид.