ШУМОРАИ БЕМОРОН КАМ МЕШАВАД

Душанбе,  15 июн. (АМИТ «Ховар»,  Кристина Эрлих ). —  Дар  изҳороти  муштараки  барои матбуот  интишордодаи  Вазорати тандурустии Ҷумҳурии  Тоҷикистон, Созмони  ҷаҳонии  тандурустӣ ва  Муассисаи  наҷоти  атфоли  СММ гуфта  мешавад, ки  қабл  аз  оғози  даври  чоруми  дорудиҳӣ  ба  бачагон шумораи  беморони  гирифтори  фалаҷи  ҳароммағз  дар  Тоҷикистон   торафт  кам  мешавад. Дар  изҳорот  омадааст, ки   маъракаи  миллии  дорудиҳӣ  барои  пешгирии  бемории   фалаҷи  ҳароммағз  сабаби   ниҳоят  кам  гардидани  беморон   шуд. Вақтҳои охир   шумораи   бачагони  то  6 – солаи  ба  ин  беморӣ гирифторшуда ба таври назаррас  кам  гардид.  Мутахассисон  пешбинӣ  мекунанд, ки тамоили  коҳиш  ёфтани   беморӣ  дар  натиҷаи   даври  сеюми  дорудиҳӣ  идома  хоҳад  ёфт. Имрӯз  дар  Тоҷикистон   даври  чоруми  дорудиҳӣ  ба  бачагон  шурӯъ  шуд. Дар  ин  давра  ба бачагони  то  сини  16 – сола  дору  дода  мешавад. Баррасии  доимии дараҷаи  паҳн  гардидани  беморӣ   зарурати   давом додани   дорудиҳиро  ба бачагони  нисбатан  калонсол  ба  миён  гузошт,  зеро   наврасони  то  16  — сола низ  ба  ин  беморӣ  ба  осонӣ  гирифтор  шуда метавонанд. Вазири тандурустии  Ҷумҳурии  Тоҷикистон  Нусратулло  Салимов  зикр  кард, ки  даври  чоруми  дорудиҳӣ  низ  бо  кӯмаки  Созмони  ҷаҳонии тандурустӣ,  Муассисаи  наҷоти  атфоли  СММ  ва  мамлакатҳои  мададгор  гузаронида  мешавад.  Ҳадафи он   кам  кардани   шуморони  беморон,  маҳдуд  сохтани  доираи  паҳн  гардидани  беморӣ  ва мустаҳкам  намудани  муқовимати   организми  бачагон  ба  ин  бемории  вазнин  мебошад. Роҳбари  намояндагии  Созмони  ҷаҳонии  тандурустӣ дар  Тоҷикистон  Сантино Саварони  низ  изҳор  намуд, ки   вақтҳои охир  теъдоди  беморони гирифтори  фалаҷи  ҳароммағзи  аз  мамлакатҳои  хориҷӣ  овардашуда дар  мамлакат  ба  андозаи  назаррас  кам  гардидааст. Инро  натиҷаҳои таҳқиқоти  лабораторӣ  тасдиқ  менамоянд,  гуфт  вай. Намояндаи  Муассисаи  наҷоти  атфоли  СММ дар  Тоҷикистон  Хонгвей Гао  ба  хабарнигорон  гуфт, ки  се  давраи  дорудиҳӣ  ба  бачагон  муташаккилона  ва  самарабахш  гузашт. Акнун  мо  бояд  кӯшиш  кунем, ки  дар  даври  чорум  ҳам  натиҷаҳои бештар  ба  даст оварда шаванд.