ҲАЙАТИ УСТОДОНИ ЭРОНӢ ДАР ДУШАНБЕ

Душанбе, 26 июл.(АМИТ «Ховар», Марзия Саидова).-Ҳайати 40 нафараи устодони як қатор донишгоҳҳои Ҷумҳурии Исломии Эрон таҳти роҳбарии муовини Раис оид ба бахши омӯзишии Донишгоҳи Теҳрон Саидмаҳдии Қайсарӣ ба Душанбе ташриф оварданд. Сафари устодони донишгоҳҳои Эрон ба Тоҷикистон дар доираи тақвияти ҳамкориҳои судманди Тоҷикистону Эрон  ва муассисаи фарҳангии ЭКО сурат гирифтааст. Масъули бахши фарҳанг ва матбуоти Сафорати Эрон дар Душанбе Ҳусайн Ширхонӣ ба АМИТ «Ховар» иттилоъ дод, ки  зимни сафари худ ҳайати устодони донишгоҳҳои Эрон аз донишгоҳҳои Тоҷикистон, аз ҷумла  Донишгоҳи миллии Тоҷикистон ва Донишгоҳи давлатии омӯзгории ба номи С. Айнӣ ва дигар муассисаҳои илмию фарҳангии Тоҷикистон боздид намуда, бо ҳайати устодони ин донишгоҳҳо мулоқот менамоянд. Ҳамзамон,  ҳайат аз Китобхонаи миллии Тоҷикистон ба номи Абулқосим Фирдавсӣ, Осорхонаи миллии ба номи Камолиддин Беҳзод  ва муассисаҳои илмию фарҳангии шаҳри Қӯрғонтеппа дидан менамояд.