517 КОМБАЙН БАСАНДА НЕСТ

Душанбе, 5 июл. (АМИТ «Ховар», Лаззат Диловарзод).- Тибқи маълумоти фаврии Раёсати растанипарварии Вазорати кишоварзӣ, соли ҷорӣ дар майдони 298 ҳазору 685 га ғалладона ва лӯбиёгиҳо кишт карда шудааст. То 30- юми июни соли ҷорӣ аз майдони 75 ҳазору 291 гектар, ки 25,2 фоизи ҳаҷми умумии майдони киштро ташкил медиҳад ғалла  даравида шуда,  62 ҳазор гектари он кӯфта шудааст. Бо вуҷуди он ки майдони кӯфташудаи ғалла нисбат ба ҳамин давраи соли гузашта қариб 25 ҳазор гектар зиёд аст, аммо обу ҳаво нисбатан сербориш  омада,  кӯфтани ғалларо мушкилтар сохтааст. Аз ин рӯ хоҷагиҳоро зарур аст, ки аққалан аз 1000 комбайни ғалладарав дар мавсими ҷамъоварӣ истифода намоянд. Ин дар ҳолест, ки айни замон ҳамагӣ 517 комбайн дар 32 ҳазор ҳоҷагиҳои деҳқонӣ (фермерӣ) мавриди истифода мебошанд. Дар сурати сербориш омадани моҳи август имконияти даравида шудани ғалла аз даст рафта, ҳосил ҷамъоварӣ нашуда мемонад.