БАРНОМАҲОИ НАВ АМАЛӢ МЕГАРДАНД

Душанбе, 14 июли  (АМИТ «Ховар», Мавзуна Бойева).- Корхонаи Воҳиди Давлатии  «Хоҷагии Манзилию Коммуналӣ» дар ҳамкорӣ бо Бонки Ҷаҳонӣ дар 8 шаҳру маркази ноҳияҳои Қӯрғонтеппа, Кӯлоб, Ваҳдат, Данғара, Восеъ, Рашт, Конибодом ва Истаравшан Лоиҳаи рушди инфраструктураи маҳаллӣ (коммуналӣ) дар Ҷумҳурии Тоҷикистон-ро амалӣ менамояд ва дар марҳилаи 3-юми Лоиҳа бинобар дар нимсолаи аввали соли 2010 гузаронида нашудани тендери пудратчиён, корҳои баркарорсозии системаҳо оғоз нагардидаанд, гуфт муовини директори генералии КВД «Хоҷагии Манзилию Коммуналӣ» Нозимшо Сарошоев зимни нишасти матбуотӣ оид ба ҷамъбасти нимсолаи аввали соли 2010. КВД «ХМК» баҳри ҷалби сармоягузорони хориҷи, ташкилотҳои байналмилалии молиявӣ ва ватанӣ, бо мақсади дар амал татбиқ намудани Барнома лоиҳаҳои инвеститсионӣ таҳия намуда, ба ташкилотҳои дахлдор пешниҳод намуд. Аз ҷумла, лоиҳаи пешниҳоднамудаи КВД «Хоҷагии Манзилию Коммуналӣ» оид ба барқарорсозии системаҳои обтаъминкунӣ ва канализатсияи шаҳру ноҳияҳои ҷануби Тоҷикистон – Қургонтеппа, Кӯлоб ва Данғара ба маблағи 6,173 миллион доллари ИМА аз ҷониби Бонки Аврупоии Таҷдид ва Рушд дастгирӣ ёфт, ки 2,000 миллион доллари ИМА қарзи имтиёзнок ва 4,173 миллион доллари ИМА он грант буда, лоиҳа дар ҳолати маблағгузорӣ мебошад ва корҳо дар ин самт давом доранд- гуфт дар хотима Н.Сарошоев.