БАРНОМАИ ТАРБИЯИ ҶАВОНОНИ СУҒД БАРОИ СОЛҲОИ 2011-2013

Душанбе, 2 июл. (АМИТ «Ховар», Бекназари Абӯбакр). — Барномаи тарбияи ватандӯстии ҷавонони вилояти Суғд барои солҳои 2011-2013 қабул гардид. Дар ин бора раиси вилояти Суғд Қоҳир Расулзода қарори махсус ба тасвиб расонид. Аз хадамоти матбуоти раиси вилояти Суғд ба АМИТ «Ховар» иттилоъ доданд, ки ҳадаф аз қабули ин барнома, тарбияи маънавию ҷисмонии ҷавонон, инкишофи ҳисси ватанпарастӣ ва муҳаббати онҳо нисбат ба Ватан баҳри ҳифзи амният, таҳкими истиқлолият ва ободии Ватан, таблиғоти ифротгароёна ва оштинопазирии милливу мазҳабӣ, эмин нигоҳ доштани ҷавонон, пешгирӣ кардани зуҳуроти ифротгароӣ ва таассуби динӣ дар байни ҷавонон, инчунин барои мусоидат ва тавсеа бахшидани ҳисси худшиносӣ, садоқат ба Ватан, нангу номуси миллӣ ва фароҳам овардани шароит барои таҳкими заминаи маърифати ҳуқуқӣ, сиёсӣ ва фарҳангии ҷавонон мебошад. Дар ҷараёни татбиқи барнома, чорабиниҳои ташкилию оммавӣ ва фарҳангӣ, аз ҷумла ташкили корҳои таблиғотӣ дар муассисаҳои таълимӣ ва қисмҳои ҳарбӣ бо иштироки зиёиён, собиқадорони ҷангу меҳнат ва шахсони мӯътабар, ташкил ва гузаронидани семинар-машваратҳо дар мавзӯъҳои мухталиф, аз қабили роҳҳои таъмини иҷрои анъанаҳои мардумӣ дар шароити истиқлолияти давлатӣ, истифодаи анъанаҳои қадимаи мардумӣ дар тарбияи насли наврас, истифодаи арзишҳои маънавӣ дар ташаккули худшиносии миллии ҷавонон дар назар аст.