ДАР НИМ СОЛ 27 ҲАЗОР НАВЗОД

Хуҷанд,20 июл. (АМИТ  «Ховар», Санавбар Мақсудова).  То санаи 1-уми июли   соли 2010  аҳолии шимоли мамлакат  ба 2  миллиону  237,2  ҳазор  нафар расид , ки  он нисбат ба  давраи ҳисоботии   соли гузашта 21 ҳазору 547  нафар зиёд мебошад.  Дар ин бора  ба мухбири  АМИТ «Ховар»  аз сарраёсати  вилоятии Агентии  омори назди  Ҳукумати ҷумҳурии  Тоҷикистон хабар доданд. Тибқи  хабари сарчашма   дар нимсолаи  аввали соли 2010  дар вилоят   зиёда аз  27 ҳазор кӯдак таваллуд шадааст, ки нисбат ба давраи ҳисиботии соли гузашта  2 ҳазору  573 нафар зиёд мебошад. Мувофиқи иттилои  сарчашма то 1-уми  июли соли ҷорӣ  шумораи кормандони   соҳаи хоҷагии  халқи вилоят, ки  ба онҳо  маош дода  мешавад, 194,2  ҳазорро ташкил медиҳад. Музди миёнаи маош то якуми июни  соли  ҷорӣ  дар вилоят 248,5  сомониро ташкил дод. Дар вилояти Суғд 75 ҳазору 500  оилаи камбизоат   зиндагӣ менамояд.  Тибқи қарори   Ҳукумати ҷумҳурии  Тоҷикистон  аз 1-уми   августи соли 2008 « Дар  бораи зиёд намудани   кӯмак ба оилаҳои  камбизоат»  дар моҳҳои   январ- апрели соли 2010 аз буҷаи  ҷумҳуриявӣ барои ин  табақаи аҳолӣ  5,6 миллион  сомонӣ маблағ ҷудо гаштааст. Аз ин миқдор 4,2 миллион сомонии он   ба  оилаҳои камбизоат барои супоридани ҳаққи нерӯи барқ ва 1,4 миллион сомонии он барои истифодаи ҳаққи  хизмати  газ пардохта шудааст.