ДАСТГОҲ МУНТАЗИРИ КОРШИНОС

Душанбе, 14 июл. (АМИТ «Ховар», Л. Додо). Дар шаш моҳи соли 2010  90 дар сади муассисоти тандурустии ВМКБ таъмир  ва аз нав сохта шудаанд. Дар нимсолаи аввал аз ҷониби Вазорати тандурустӣ  ба муассисоти тандурустии вилоят кӯмаки зиёд расонида шуд. Тамоми муассисоти тандурустии навоҳии вилоятро бо таҷҳизоти тиббӣ муҷаҳҳаз гардониданд. Ба маблағи 73 ҳазор доллари амрикоӣ барои беморхонаи марказӣ ва Маркази саломатии ноҳияи Ванҷ таҷҳизоти тиббӣ, аз ҷумла таҷҳизоти ташхисии электрокардиографӣ, рентгенӣ, ултрасадо, эндоскопӣ, озмоишгоҳҳои клиникӣ, бактериологӣ, таҷҳизотҳои табобати дандонпизишкӣ, физиотерапевтӣ  ва маводи доруворӣ харида шуд.  Таҷҳизоти ташхисии ултрасадоии доплерӣ, эндоскопӣ, бронхоскопӣ, систоскопӣ, дастгоҳҳои нафасдиҳандаи сунъии Марказҳои саломатии ноҳияҳои Шуғнон, Мурғоб, Роштқалъа ва Ишкошим таъмир шудаанд, вале бо вуҷуди нарасидани мутахассисони соҳа ва духтурон аз фаъолият боз мондаанд. Барномаҳои соҳавие, ки аз тарафи Ҳукумати Ҷумҳурии Тоҷикистон тасдиқ шудаанд, дар сатҳи лозима амалӣ намегарданд. Дар тамоми вилоят ҳамагӣ се муассисаи хусусии тиббӣ вуҷуд дораду халос.  Бояд дар ин самт мақомоти дахлдори вилоят чораҳои зарурӣ андешида, ҷиҳати ҳалли проблемаҳои ҷойдошта, инчунин беҳтар гардонидани сатҳи хизматрасони ба аҳолии ин минтақаи дурдаст тадбирҳои мушаххас андешанд.