М. ИНОЯТОВА : « МО ДАР ПАЙИ ҲИМОЯИ ҲУҚУҚУ МАНФИАТҲОИ ДУХТАРОНЕМ»

Душанбе ,16 июл. (АМИТ « Ховар»,  Ибодат Давлатова).- «Хадамоти дастгирӣ барои духтарон»-чунин  ном дорад  лоиҳаи наве , ки аз ҷониби  Кумитаи кор бо занон ва  оилаи назди  Ҳукумати ҷумҳурии  Тоҷикистон дар  ягҷоягӣ бо  Маркази Ҳуқуқи Кӯдак  ва Маркази   ҳуқуқии кӯдаконаи    Британияи Кабир  роҳандозӣ мегардад. Тавре ба мухбири  АМИТ « Ховар» коршинос оид  ба сиёсати  лоиҳаи «Хадамоти дастгирӣ  барои духтарон» Мунира Иноятова хабар дод , лоиҳаи   мазкур  аввалин   хадамоти хизматрасонӣ  дар миқёси   ҷумҳурӣ  мебошад, ки     духтарони аз 10 то 18 солаи   мавриди зӯроварӣ , таҷовуз , қочоқ ва истисмор  қароргирифтаро  дастгирӣ менамояд. Аз рӯи гуфтаҳои ӯ ҳуқуқшиносони Хадамоти марказ  ба духтароне , ки    ба бадбахтӣ гирифтор шудаанд ,телефонӣ  маслиҳатҳои  ҳуқуқӣ  дода,  ҳамчунин  ҳангоми  гузаштани мурофиаҳои   судӣ манфиати онҳоро ҳимоя менамоянд. Равоншиносони   марказ ҳолати  рӯҳии духтаронро   омӯхта, ба онҳо   кӯмак мерасонанд. Дар марказ   20 нафар  духтари  аз 14 то 18 сола метавонанд 6 моҳ зиндагӣ кунанд.  Ба  ҳар як  духтар    барои раҳоӣ аз зарбаи рӯҳии  гирифтааш бо ёрии  кормандон  кӯмаки мустақилона расонида , ҳамчунин  барои соҳиби  дониши умумӣ ва касбӣ  гаштанашон   кӯмаку мусоидат менамоянд. М. Иноятова зикр намуд, ки  дар марказ  ҳамчунин ҷой барои истиқомати  мустақилона мавҷуд аст.  Дар ин макон 12 нафар духтари аз 16  то 18 сола  ба муддати   як сол метавонанд истиқомат намоянд .  Ин хизматрасонӣ  барои духтароне , ки ба дастгирии доимӣ ниёз доранд, пеш аз оғози ҳаёти мустақилона равона гаштааст. Дар марказ ба духтарон  таълими меҳнатӣ дода мешавад.