МАҲСУЛОТИ ҒАЙРИСТАНДАРТӢ АЗ ФУРӮШ БОЗДОШТА ШУД

Душанбе, 16 июл. (АМИТ «Ховар», Ибодат Давлатова). – Дар нимсолаи аввали соли ҷорӣ корхонаҳо ва шахсони инфиродие, ки бе истифодаи ҳуҷҷатҳои меъёрӣ-техникӣ, стандартҳо, шароити мувофиқи истеҳсолӣ ва баъзан пинҳонӣ маҳсулот истеҳсол менамуданд, ошкор карда шуданд. Дар ин бора дар нишасти матбуотии Агентии стандартизатсия, метрология, сертификатсия ва нозироти савдои назди Ҳукумати Ҷумҳурии Тоҷикистон иттилоъ доданд. Инчунин, қайд намуданд, ки 3 тонна биринҷ, 4,5 тонна маҳсулоти гуштӣ, 610 килограм майонез, 1085 дал машруботи спиртӣ, 2,15 тонна маҳсулоти макаронӣ ва ғайра аз фурӯш  боздошта шуда, нисбат ба онҳо тибқи тартиби муқарраргардида тадбир андешида шуд. Барои риоя накардани меъёри стандартҳо, истифодаи воситаҳои ченаки корношоям, вориду фурӯши  маҳсулоти ғайристандартӣ 955 нафар шахсони ҳуқуқӣ ва воқеӣ ба маблағи 166684 сомонӣ ҷарима баста шуда, ин маблағҳо ба буҷаи ҷумҳурӣ ирсол карда шуданд.