МАБЛАҒ БАРОИ ТАЪМИРИ ОСОРХОНА

Душанбе, 16 июл. (АМИТ «Ховар», Ибодат Давлатова). – Бо мақсади таъмиру тармими осорхонаи муаллифи асари безаволи «Тоҷикон», Қаҳрамони Тоҷикистон Бобоҷон Ғафуров, ки дар ҷамоати деҳоти Исфисори ноҳияи Бобоҷон Ғафуров воқеъ аст, аз ҳисоби буҷети вилоятӣ 100 ҳазор сомонӣ ҷудо гардид. Дар ин бора Раиси вилояти Суғд Қоҳир Расулзода қарор «Оид ба ҷудо намудани маблағ»-ро   имзо намуд. Тавре аз Хадамоти матбуоти Раиси вилояти Суғд ба АМИТ «Ховар» иттилоъ доданд, тибқи қарори мазкур мақомоти иҷроияи ҳокимияти давлатии ноҳияи Бобоҷон Ғафуров вазифадор шудааст, ки истифодаи мақсаднок ва самарабахши маблағи ҷудошударо таъмин намояд. Ёдрас мешавем, ки дар ҷараёни рӯзи қабули шаҳрвандон аз ҷониби Раиси вилоят дар ноҳияи Бобоҷон Ғафуров, ки санаи 27 майи соли ҷорӣ баргузор шуда буд, сокинони ин ноҳия аз Қоҳир Расулзода барои мусоидат намудан ба таъмиру тармими осорхона кӯмак пурсида буданд ва қарори зикршудаи Раиси вилояти Суғд дар ин замина ба тасвиб расид.