АЗ СӮХТОР ЭҲТИЁТ ШАВЕД

Душанбе, 20 август. (АМИТ «Ховар», Зебо Иноятова).- Ҳафтаи сипаригашта дар миқёси ҷумҳурӣ 34 ҳодисаи сӯхтор ба қайд гирифта шуд, ки дар натиҷаи онҳо  ба хоҷагии халқ 104 ҳазору 316 сомонӣ зарар расид. Масоҳати умумии онҳо 1 ҳазору 62 метри мураббаъ буд. Чун ҳарвақта сабаби ҳодисаҳои нохуш ин оташбозии кӯдакон, муносибати беэҳтиётона бо оташ, риоя накардани қоидаҳои бехатарӣ ҳангоми истифодаи асбобҳои барқӣ ва газӣ, расиши кӯтоҳи ноқилҳои барқӣ мебошад. Аз ҷумла, ҳафтаи гузашта дар вилояти Суғд-12, Хатлон-6, Душанбе-4, Ҳисор-4, ВМКБ-2, Ваҳдат-2, Роғун-1, Рӯдакӣ-1, Варзоб-1 ва Файзобод-1 сӯхтор ба қайд гирифта шудааст. Шаби 18 августи соли равон дар манзили истиқоматкунандаи кӯчаи Ӯш -2-и ноҳияи Мурғоби ВМКБ  Расул Жамиқулови 32 сола дар натиҷаи расиши кӯтоҳи симҳои барқ сӯхтор ба амал омад ва ба соҳиби хона ба маблағи 5 ҳазор сомонӣ зарари моддӣ расонд. Масоҳати сӯхтор 90 метри мураббаъ буд.