ДАР МОҲИ РАМАЗОН НАРХИ МАҲСУЛОТ ТО 20 % КОҲИШ ДОДА МЕШАВАД

Душанбе, 6 август.(АМИТ «Ховар», Марзия Саидова).-Соҳибкорони пойтахт тасмим гирифтаанд, ки дар моҳи шарифи Рамазон нархи 1 килограмм гӯшти говро  18 сомонӣ, гӯшти гӯсфандро то 19 сомонӣ, нархи як халта орди навъи якумро  то 90 сомонӣ ва равғани растанӣ, равғани маска, шир, тухм, биринҷ, шакар, картошка, помидор, пиёз, сабзӣ, карам, ангур ва харбузаю тарбузро то 20 % аз нархи бозор арзонтар ба фурӯш гузоранд. Масъалаи мазкур дар ҷаласаи шаҳрдории пойтахт, ки дар ҳузури Раиси шаҳри Душанбе Маҳмадсаид Убайдуллоев баргузор шуд,  баррасӣ гардид. Дар робита ба иқдоми соҳибкорони пойтахт Маҳмадсаид Убайдуллоев КВД «Савдо ва  бозорҳои шаҳри Душанбе» ва бозорҳои зертобеи онро мувваззаф намуд, ки дар моҳи мубораки Рамазон барои деҳқононе, ки маҳсулоти кишоварзиро бе миёнаравҳо  ба фурӯш мебароранд, сабукиҳо диҳанд. Тибқи иттилои котиби матбуотии Раиси шаҳри Душанбе Шавкат Саидов, тоҷирону соҳибкороне, ки ба воридоту фурӯши  маҳсулоти дар боло зикршуда машғуланд, аз пардохти ҳамагуна намуди  хизматрасониҳо ба пуррагӣ ва ё ба андозаи 50 % озод карда мешаванд.