КАМБУДИҲОИ БОЗОРҲОИ НОҲИЯИ Б. ҒАФУРОВ ОШКОР ГАРДИД

Душанбе, 3 август. (АМИТ «Ховар», Бекназари Абӯбакр). -Мутобиқи нақшаи чорабиниҳои мақомоти иҷроияи ҳокимияти давлатии вилояти Суғд дар нуқтаҳои савдо ва хӯроки умумии ноҳияи Бобоҷон Ғафуров ҳолати риояи қарори раиси вилоят «Оид ба пурзӯр намудани назорат ва тадбирҳои ба танзим овардани соҳаи коркарду фурӯши маҳсулоти чорво ва маводи хӯрока», риояи талаботи стандартҳо, ҳуҷҷатҳои меъёрӣ доир ба сифат ва бехатарии маҳсулот, маданияти кору хизматрасонӣ ва ҳимояи бозори истеъмолӣ аз маҳсулоти пастсифат мавриди омӯзиш қарор гирифт. Аз хадамоти матбуоти раиси вилояти Суғд ба АМИТ «Ховар» хабар доданд, ки дар ҳудуди бозори «Фаровон» ва дигар нуқтаҳои савдо ва хӯроки умумии ноҳияи Бобоҷон Ғафуров бо ширкати мутахассисони  шӯъбаи ҳамкории иқтисодии хориҷӣ ва савдои мақомоти иҷроияи ҳокимияти давлатии вилояти Суғд, Маркази назорати давлатии санитарии-эпидемиологии ноҳия рейди муштарак гузаронида шуда, як қатор камбудиҳо ошкор гардид. Ба мақомоти иҷроияи ҳокимияти давлатии ноҳияи Бобоҷон Ғафуров пешниҳод карда шуд, ки фаъолияти минбаъдаи роҳбарони ин бозорҳо ва дигар нуқтаҳои соҳаҳои савдоро зери назорат гирифта, барои бартараф намудани камбудиву норасоиҳои ҷойдошта чораҳои зарурӣ андешанд.