КИТОБХОНА-МАКОНИ ДОНИШ

Ҷиргатол, 18 август.( АМИТ « Ховар», М. Ризвонов).- Китобхонаи марказии ноҳияи Ҷиргатол, ки  мудираш       Гулнисо Абдураззоқова мебошад,ҷойи дӯстдоштаи хонандагон  ба шумор меравад . Дари     китобхона ҳамеша ба рӯйи  мизоҷон  кушода буда , дар он 16904 адад адабиёти гуногун мавҷуд аст. Айни ҳол сафи мизоҷони китобхона ба  1380 нафар расидааст , ки  нисбат ба  соли  гузашта 120  нафар зиёд аст. Барои ҷалби омма ба китобу китобхонӣ дар ин ҷо мунтазам чорабиниҳои гуногун , ба монанди маҳфилҳои адабӣ , мулоқоту сӯҳбат бо зиёиён, намоишҳои китоб доир мегарданд. Барои осон шудани дарёфти адабиёти зарурӣ  китобҳо аз рӯи соҳа ва бо тартиби алифбо гузошта шудаанд. Кормандони китобхона кӯшиш менамоянд , ки тавассути фаъолияти судманди худ   дар кори маърифатнокии аҳолии деҳот саҳмгузор  бошанд. Натиҷаи саъйу талоши онҳост , ки сафи китобхонон рӯз то рӯз зиёд мегардад. Китобро  беҳуда аниси кунҷи танҳоӣ нагуфтаанд, -мегӯяд мудири китобхона Гулнисо  Абдураззоқова. Савияи  дониш  ва  ҷаҳонбинии одам  тавассути донишомӯзӣ васеъ  мешавад. Донишро тариқи омӯзиши пайваста , яъне мутолиаи китобу маҷалла  метавон афзун кард. Аз ин рӯ мо, китобдорон , тамоми тадбирҳоро меандешем , ки ин  боргоҳи маърифат  ҳамеша  серодам  бошад,- афзуд Г. Абдураззоқова.