МАҶМӮА БАХШИДА БА СОЛИ ПОЙТАХТИ ФАРҲАНГИ ИСЛОМӢ

Душанбе, 23 август.(АМИТ «Ховар», Марзия Саидова).-Ба ифтихори соли 2010 ҳамчун пойтахти фарҳанги исломӣ эълон шудани шаҳри Душанбе   маҷмӯаи рангаи аксҳо бо номи «Душанбе» бо теъдоди 500 адад аз чоп баромад. Муаллифи маҷмӯаи аксҳо мухбири суратгири  рӯзномаи шаҳрии «Паёми Душанбе» Неъматулло Алиев буда, дар он аксу расмҳои биноҳои гуногуни маъмурию иқтисодӣ, фарҳангию иҷтимоӣ ва манзараҳои зебои пойтахт  гирд оварда шудаанд. Дар муқоваи маҷмӯаи аксҳо дарвозаҳои ғарбию шарқӣ ва ҷанубии пойтахт, инчунин, рамзи пойтахт ва бинои мақомоти иҷроияи ҳокимияти давлатии шаҳри Душанбе инъикос гардидаанд. Ҳамзамон, дар маҷмӯа маълумотномаи мухтасар дар бораи пойтахт  бо забонҳои тоҷикию русӣ ва англисӣ ҷо дода шудааст, ки раҳнамои хубест барои сайёҳону меҳмононе, ки ба шаҳри Душанбе ташриф меоранд.