ТӮҲФА БА СОЛИ НАВИ ХОНИШ

Ҳамадонӣ, 6 август. ( АМИТ « Ховар», Сулаймон Холов). Дар тӯли солҳои  соҳибистиқлолии мамлакат дар пасманзари тадбирандешиҳои пайвастаи Давлату Ҳукумат ҷиҳати   рушди соҳаи маорифи кишвар  сатҳу сифати таълиму тарбия   боло рафтаву як қатор  муассисаҳои таълимӣ   таъмиру азнавсозӣ гардиданд. Дар ноҳияи Мир Сайид Алии Ҳамадонӣ  айни замон дар қатори  бунёди якчанд иншооти маъмурию маишӣ  сохтмони мактаби хуштарҳу замонавӣ дар арафаи анҷомёбист. То имрӯз аз 1 миллиону 700 ҳазор сомонии барои иншооти мазкур, ҷудогардида беш аз 1 миллиону 600 ҳазор сомонӣ азхуд карда шуда , корҳои сохтмониро бинокорони  Ширкати масъулияташ маҳдуди « Махсус» ба ӯҳда доранд.          Мактаби нав, ки барои ба таълим фаро гирифтани 624 хонанда дар 2 баст  пешбинӣ гардидааст,дорои синфхонаҳои кушоду барҳаво, озмоишгоҳҳои  таълими физикаю химия , толорҳои маҷлисию варзишии муосир буда,  айни ҳол дар  ин ҷо  охирин корҳои сохтмонӣ,  аз қабили  рангуборкунӣ,  кабудизоркунии гирду атроф ва саҳни мактаб бо сифати баланд  ба анҷом расонида мешаванд. Тибқи иттилои масъулин ҷиҳозонидани мактаб бо таҷҳизоти муосири таълимӣ ҷараён дошта, иншоот    оғози соли нави хониш мавриди истифода қарор мегирад.