«ТОҶИКИСТОН»-МИНБАРИ АФКОРИ НАВИН

Душанбе, 25 август. (АМИТ «Ховар», Бекназари Абӯбакр). — Шумораи навбатии маҷаллаи «Тоҷикистон» аз чоп баромад, ки дар саҳифаҳои аввали он иқтибос аз суханрониҳои Президенти Ҷумҳурии Тоҷикистон Эмомалӣ Раҳмон дар ҷашни 13-умин солгарди Рӯзи Ваҳдати миллӣ ва фаъолияти Президент аз 5 июл то 5 август инъикос ёфтааст. Дар саҳифаҳои дигари ин маҷалла навидҳои фарҳангӣ, тасаллияти Вазорати фарҳанг нисбат ба марги сарояндаи маъруф, Ҳунарпешаи халқии Тоҷикистон Зафар Нозим ва мақолаву гузоришҳои сиёсиву иқтисодӣ ва иҷтимоиву фарҳангӣ ҷой дода шудааст. Зикр кардан бамаврид аст, ки «Тоҷикистон» ягона маҷаллаи ҷамъиятию сиёсӣ, иқтисодӣ ва иҷтимоию фарҳангӣ буда, минбари афкори навине аст, ки дар он аз рушди иқтисодию иҷтимоии хоҷагии халқи мамлакат ва илму фарҳанг маводи хонданию ҷолиб нашр мешаванд. Мавриди ёдоварист, ки нашри маҷаллаи «Тоҷикистон» соли 1938 оғоз гардида, ҳоло дар як сол 6 маротиба чоп мешавад.