Қ. РАСУЛЗОДА ҚАРОРРО ДАР БОРАИ СОХТМОНИ НЕРӯГОҲҲОИ НАВ БА ИМЗО РАСОНД

     Душанбе, 13 сентябр. (АМИТ «Ховар», Бекназари Абӯбакр). — Бо мақсади таъмини иҷрои Қарори Ҳукумати Ҷумҳурии Тоҷикистон оид ба бунёди нерӯгоҳҳои хурду миёна раиси вилояти Суғд Қоҳир Расулзода «Дар бораи Барномаи дарозмуддати бунёди силсилаи нерӯгоҳҳои хурди барқӣ дар давраи солҳои 2009-2020» қарори махсус ба тасвиб расонд.    Мутобиқи қарори мазкур бунёди нерӯгоҳҳои барқи обии хурд, аз қабили «Дашти Оббурдон»-и ноҳияи Кӯҳистони Мастчоҳ бо арзиши 84 ҳазор доллари ИМА, «Зеробод»-и ноҳияи Айнӣ бо арзиши 84 ҳазор доллари ИМА, «Пунғус»-и ноҳияи Ашт бо арзиши 72 ҳазор доллари ИМА, «Басманда»-и ноҳияи Ғончӣ бо арзиши 84 ҳазор доллари ИМА ба нақша гирифта шудааст.     Инчунин, бунёди нерӯгоҳҳои барқи обии миёна, аз ҷумла «Ворух» дар ноҳияи Исфара бо арзиши 600 ҳазор доллари ИМА, «Катасой»-и ноҳияи Истаравшан бо арзиши 3 миллиону 600 ҳазор доллари ИМА, «Падруд» дар ноҳияи Панҷакент бо арзиши 1 миллиону 361 ҳазор доллари ИМА, «Падаск»-и ноҳияи Кӯҳистони Мастчоҳ бо арзиши 1 миллиону 56 ҳазор доллари ИМА, «Марзич»-и ноҳияи Айнӣ бо арзиши 3 миллиону 433 ҳазор доллари ИМА, «Хитой» дар ноҳияи Ҷаббор Расулов бо арзиши 3 миллиону 600 доллари ИМА ва амсоли инҳо бо сармояи ватаниву хориҷӣ пешбинӣ гардидаанд.