БАРНОМАИ МУВОФИҚКУНОНИИ ИҚЛИМ ДАР ТОҶИКИСТОН

            Душанбе, 20 сентябр. (АМИТ «Ховар», Лаззат Диловарзод).- Бино ба гуфти ҷонишини намояндаи доимии Бонки  осиёгии Рушд дар Ҷумҳурии  Тоҷикистон ҷаноби Ҷоҷӣ Токешӣ ба сабабҳои экологӣ 56 фоизи аҳолӣ ба хӯроки серӣ ва 41 фоиз бо оби ошомиданӣ дастрасӣ надоранд.             Бо ин мақсад, Бонки осиёгии Рушд дар ҳамкорӣ бо Бонки Аврупоии тараққиёт Барномаи пилотии мувофиқкунонии иқлимро барои Тоҷикистон роҳандозӣ кардан мехоҳад, ки мақсади он кӯмак расонидан дар паст кардани оқибатҳои нохуши иқлим дар саросари Ҷумҳурии Тоҷикистон аст.             Бояд тазаккур дод, ки ҳар сол бо сабаби инҷиқиҳои табиат ҳосили ҳазорҳо гектар ғаллазор ва боғу токзорҳо нобуд  мегардад.             Солҳои охир бо сабаби гармшавии иқлим ва нарасидани об ҳосили парваридаи ғалла, сабзавот, полезӣ ва боғу токзор дар шаҳру ноҳияҳои ҶТ нобуд мегардад. Дар ин бора намояндагони ҶТ дар конфронси байналмилалии Копенгаген андешаҳои худро иброз дошта буданд.             Барномаи мазкур бо тарзи грантӣ дар ҳаҷми 50 млн. доллари амрикоӣ барои Ҷумҳурии Тоҷикистон  пешбинӣ шудааст, ки дар таҳияи он мутахассисони тоҷик мехоҳанд ширкат  дошта бошанд.