МАРГ БАР АСАРИ САДАМА

Душанбе, 7 сентябр. (АМИТ «Ховар», Жасмин Назарова). — Рӯзи 6 сентябри соли равон ронандаи автомашинаи тамғаи «Опел-Вектра» Худойназаров Бахтиёр, соли таваллудаш 1987, истиқоматкунандаи ҷамоати Фрунзеи ноҳияи Ҷилликӯл ҳангоми ҳаракат аз ноҳияи Ҷилликӯл ба самти ноҳияи Қубодиён, дар ҳудуди деҳаи Гогол аз ӯҳдаи идораи автомашина набаромада, ба тарафи чапи роҳ ба ҷарии чукуриаш тахминан 27 м чаппа мешавад. Тавре аз дафтари матбуоти Вазорати корҳои дохилии ҶТ иттилоъ доданд, дар натиҷа мусофири автомашинаи номбурда ноболиғ Суюнов Сухроб, соли таваллудаш 2005, истиқоматкунандаи деҳаи Гогол аз сабаби гирифтани ҷароҳати вазнини ҷисмонӣ ҳангоми ба беморхона бурдан ба ҳалокат мерасад. Мусофирони дигар Суюнова Марҷона, соли таваллудаш 2002 ва Гулиева Умеда, соли таваллудаш 1977, ҷароҳати ҷисмонӣ бардошта, дар беморхонаи марказии ноҳия бистарӣ шуданд. Инчунин, рӯзи 6 сентябр ронандаи автомашинаи тамғаи ВАЗ-2101 Ҷониев Абдулазиз, соли таваллудаш 1966, истиқоматкунандаи ноҳияи Рӯдакӣ-1 ҳангоми ҳаракат аз тарафи ноҳияи Ҳисор ба тарафи шаҳри Душанбе аз ӯҳдаи идораи воситаи нақлиёт набаромада, ноболиғ Набиев Саидҷони 10 – соларо пахш кардааст. Дар натиҷа ноболиғ Набиев С. зарари ҷисмонӣ гирифта, ҳангоми ба беморхона бурдан дар роҳ ба ҳалокат расидааст.