МИРЗОАЛӢ БОЛТУЕВ БА ВЕНА РАФТ

Душанбе, 14 сентябр.(АМИТ «Ховар», Марзия Саидова).- Бо мақсади иштирок  дар семинари  таъҷилӣ оид ба масъалаи овоздиҳии электронӣ 14 сентябр Раиси  Комиссияи марказии интихобот ва райъпурсии ҷумҳурӣ Мирзоалӣ Болтуев ба пойтахти Австрия — шаҳри Вена сафар кард. Семинари мазкур рӯзҳои 16-17 сентябр таҳти васояти Раисии Ҷумҳурии Қазоқистон дар Созмони амнияту ҳамкорӣ дар Аврупо гузаронида мешавад. Аз Комиссияи марказии интихобот ва райъпурсии ҷумҳурӣ ба АМИТ «Ховар» иттилоъ доданд, ки дар семинар Мирзоалӣ Болтуев  дар мавзӯи райъдиҳии электронӣ маърӯза менамояд.  Дар семинар намояндагони ассамблеяҳои парлумонҳо, институтҳо ва созмонҳои байналмилалӣ, мақомоти интихоботӣ, созмонҳои ғайридавлатӣ,  кишварҳои  иштирокчӣ ва давлатҳои шарики САҲА иштирок менамоянд.  Интизор меравад, ки дар семинар имкониятҳои гузариш ба шакли овоздиҳии электронӣ, меъёрҳои байналмилалӣ, танзими ҳуқуқӣ ва мушоҳидаи ҷараёни овоздиҳии электронӣ ва рушди минбаъдаи овоздиҳии электронӣ дар фазои кишварҳои узви  САҲА баррасӣ мешаванд.