РӮЗҲОИ ФАРҲАНГ ПАЙВАНДГАРИ ДИЛҲО

Душанбе, 30 сентябр. (АМИТ «Ховар», Дилшодаи Ҷонмард).- Аз 7 то 11 октябри соли 2010 дар Ҷумҳурии Тоҷикистон рӯзҳои фарҳанги Федератсияи Руссия гузаронида мешавад. Дар чаҳорчӯби ин чорабинӣ баргузории маҳфили эҷодӣ ва мулоқоти иштирокчиёни Рӯзҳои фарҳанги Федератсияи Руссия  дар Ҷумҳурии Тоҷикистон бо устодон ва донишҷуёни Консерваторияи миллии  Тоҷикистон, ифтитоҳи намоиши аксҳо дар театри опера ва балети ба номи С.Айнӣ, намоиши филмҳои ҳунарии истеҳсоли Руссия дар кинотолори ба номи А.Ҷомӣ, дарси маҳорати хореографӣ бо иштироки ҳунармандони театри «Балети Кремл» ва ҳунармандони театри давлатии опера ва балети ҷумҳурӣ, хонандагони Коллеҷи хореографии ба номи М.Собирова дар назар дошта шудааст. Ҳамчунин, дар доираи Рӯзҳои фарҳанги Руссия дар Тоҷикистон нишасти матбуотии роҳбарон ва иштирокчиёни ин чорабинӣ дар вазорати фарҳанг доир мегардад. Дар назар аст, ки рӯзи 9 октябр дар театри давлатии опера ва балети ба номи С.Айнӣ консерти ҳунарпешаи халқии Руссия Роман Карсев ва худи ҳамин рӯз ҳунарнамоии  ҳунарпешагони театри «Балети Кремл» таҳти роҳбарии Ҳунарпешаи халқии Руссия Андрей Петров гузаронида мешавад. Дар доираи баргузории ин рӯзҳо меҳмонон ба дараи зебоманзари  Варзоб сафар намуда, аз ҷойҳои дигари хушманзараи диёрамон, мавзеъҳои таърихӣ ва фарҳангии кишвар боздид ба амал  меоранд.