СОХТМОНИ ХОНАҲО ҶАРАЁН ДОРАД

Кӯлоб, 16 сентябр. (АМИТ «Ховар», Мавҷуда Анварӣ). – Бо мақсади таъмини шароити хуби зиндагӣ барои аҳолии аз офати табиӣ зарардидаи шаҳри Кӯлоб Агентии назорати маводи нашъаовари назди Президенти Ҷумҳурии Тоҷикистон ду хонаи нави замонавии истиқоматӣ иборат аз 4 ҳуҷраӣ бо тамоми асбоби рӯзгор таҷҳизонидашударо ба истифода доданд. Дар маросими супоридани хонаҳои истиқоматӣ муовини директори Агентии номбурда Бунафша Одинаева иштирок намуда, дар ҳузури намояндагони аҳли ҷамоатчигии ҳукумати вилояти Хатлон калиди хонаҳои нави истиқоматиро ботантана ба соҳибонаш супорид. Бояд тазаккур дод, ки дар сохтмони ин хонаҳо мутахассисони маҳалӣ истифода шудаанд.