СОЗИШНОМАИ ГРАНТӢ БА МАБЛАҒӢ 4 МИЛЛИОН $ БА ИМЗО РАСИД

      Душанбе, 8 сентябр.(АМИТ «Ховар», Марзия Саидова).- Бо мақсади татбиқи лоиҳаи  ҷадид оид ба  идоракунии  партовҳои сахти маишӣ 8 сентябр байни шаҳрдории Душанбе ва  Бонки Аврупоии таҷдид  ва рушд  Созишномаи грантӣ  ба маблағи 4 миллион доллар ба имзо расид.     Тибқи иттилои котиби матбуотии Раиси шаҳри Душанбе Шавкат Саидов,  Созишномаи грантиро аз ҷониби шаҳрдории Душанбе муовини Раиси шаҳри Душанбе Ҷамшед Мансуров  ва аз ҷониби  Бонки  Аврупоии таҷдид ва рушд  намояндаи он дар Ҷумҳурии Тоҷикистон  Улф Хиндстром имзо гузоштанд.        Мавриди зикр аст, ки лоиҳаи мазкур ба маблағи  беш аз 10 миллион доллар, ки аз он 60, 4 % грант (4 миллион $ гранти инвеститсионии  Ҳукумати Нидерландия ва 1 миллион евро кӯмаки техникии ҳукумати Шветсия  ва фонди грантии бонк) ва 39, 6% (4 миллион $)  қарзи дарозмуддат мебошад, татбиқ карда мешавад.        Алҳол тибқи Созишномаи қарзии мазкур байни шаҳрдории Душанбе ва Бонки Аврупоии таҷдид  ва Рушд оид ба татбиқи  марҳилаи дуюми Лоиҳаи  идоракунии  партовҳои  сахти маишии пойтахт  ба имзо расида,  дар пойтахт Маркази  татбиқи Лоиҳаи  «Идоракунии  партовҳои сахти маишӣ» таъсис дода шудааст.      Дар асоси Созишномаи мазкур  техникаҳои коммуналии партовкашон, қуттиҳои зарруӣ барои ҷамъоварии партов дар  партовгоҳҳои шаҳрӣ харида мешавад. Мӯҳлати татбиқи Созшнома се сол  буда, маблағи  қарзӣ дар тӯли 15 сол пардохт карда мешавад.