ҶӮРОБҲОИ ХУДӢ МЕАФЗОЯНД

Суғд, 11 октябр.(АМИТ «Ховар», Мирзалӣ Амонов).-Истеҳсоли пахта ва коркарди ниҳоии он барои пешбурди  иқтисодиёти ноҳияи Зафаробод нақши асосӣ дошта, бунёди фабрикаи ҷӯроббофӣ аз риштаи пахтагини худӣ барои ғанӣ намудани буҷет, истеҳсол ва фурӯши ҷӯроб, таъмини аҳолии маҳаллӣ бо ҷойҳои корӣ манфиати иқтисодию иҷтимоӣ меоварад. Иқтидори лоиҳавии фабрика истеҳсоли 3 миллион ҷуфт ҷӯроб аз нахи пахтаи истеҳсоли худӣ мебошад.Навбати аввали корхона барои истеҳсоли 1,5 миллион ҷуфт ҷӯроб тавассути 30 адад таҷҳизоти бофандагӣ дар арафаи таҷлили рӯзи Сарқонуни Ҷумҳурии Тоҷикистон ба фаъолият оғоз мекунад. Корхона, ҳамчунин, дорои коммуникатсияи муҳандисии таҷҳизоти дӯзандандагӣ ва рангу бор мебошад. Ин коргоҳ бо маблағгузории ширкати «ХИК» аз ҷониби  сохтмончиёни ширкати «Тиниал» бунёд гашта,   дар навбати аввали  фаъолияти он 150 нафар бо ҷойи кор таъмин мегарданд. Дар ин иншооти истеҳсолӣ корҳои сохтмонӣ ва омодагӣ ба васлу насби таҷҳизот бовусъат ҷараён доранд.