БАҒОҶДУЗДӢ КОҲИШ МЕЁБАД

Душанбе, 25 октябр. (АМИТ «Ховар», Мавзуна Бойева)- Бо сабаби вақтҳои охир афзудани  ҳодисаҳои дуздиву ғорат кардани маводи  дохили   бағоҷи  мусофирони меомада қарор   шуд, ки  санҷиш  гузаронида шавад,  иттилоъ дод имрӯз дар нишасти матбуотӣ   муовини директори КВД «Фурудгоҳи байналмиллалии Душанбе» Азиз Иброҳимов.           Ӯ иброз дошт, ки  бо ин мақсад аз ҷумлаи кормандони фурудгоҳ, ШКД назди фурудгоҳ, кормандони хадамоти гумрук комиссия таъсис ёфта, он   аз  16 то 24 августи соли равон ҳолати бағоҷҳои рейси 628 – и хатсайри Маскав (Домодедово) — Душанберо  санҷид.  Зимни  гузаронидани  санҷиш  82 ҳодисаи осеб дидани бағоҷҳо, аз ҷумла 23  ҳодисаи  дуздиву ғорат кардани маводи   дохили  бағоҷи  мусофирон аниқ карда шуд. Санҷишҳо нишон доданд, ки дуздиву ғорат кардани маводи   дохили   бағоҷи  мусофирон маҳз дар фурудгоҳи Домодедово ба амал меоянд. Роҳбарияти фурудгоҳи Душанбе қарор дод, ки оид ба ин масъала бо роҳбарияти фурудгоҳи Домодедово мулоқоти корӣ  анҷом  диҳад. 6 октябр ин мулоқот дар Маскав (Домодедово) барпо гардид,  ки   дар анҷоми он Протоколи ҳамкорӣ оид ба ҳалли қазияи мазкур ба имзо расид. Феълан ҳодисаҳои дуздиву ғорат кардани маводи   дохили   бағоҷи  мусофирони рейси № 628 ба мушоҳида намерасад.  А.Иброҳимов,  ҳамчунин,  қайд кард, ки низоми  парвози ҳавопаймоҳо  аз фурудгоҳ аз омилҳои зиёд чун вазъи обу ҳаво, дер омадани ҳавопаймоҳо, ба ҷойҳои холӣ  шинонидани  мусофирон, тағйир ёфтани вақти парвоз, иваз кардани навъи ҳавопаймоҳо, аз назар гузаронидани мусофирон ва бағоҷ ба манфиати амнияти парвоз   вобаста аст. Теъдоди чунин таъхирҳо  дар давраи ҳисоботӣ 550 – то буд. Сабабҳои асосӣ: дер омадани ҳавопаймоҳо; носозии техникаи авиатсионӣ; номусоидии обу ҳавои фурудгоҳе, ки бояд парвоз дар он сурат мегирифт; номусоидии обу ҳавои фурудгоҳи қабулкунанда  ва ғайра мебошад,-  зикр намуд  А.Иброҳимов.