БАҲСИ МУНОСИБАТҲОИ МЕҲНАТӢ

 Душанбе, 29 октябр. (АМИТ «Ховар», Лаззат Диловарзод).- Бино ба иттилои мудири бахши робита бо ҷомеаи Вазорати меҳнат ва ҳифзи иҷтимоии аҳолӣ Файзиддин Фозилов, имрӯз дар шаҳри Душанбе конфронси илмӣ — амалии ҷумҳуриявӣ дар мавзӯи «Проблемаҳои муносибатҳои меҳнатӣ  ва рушди иҷтимоӣ дар Тоҷикистон» оғоз гардид. Конфронси мазкур бо ибтикори Муассисаи давлатии «Пажӯҳишгоҳи меҳнат ва ҳифзи иҷтимоии аҳолӣ» бо мақсади иҷрои Қарори Ҳукумати Ҷумҳурии Тоҷикистон  оид ба Стратегияи паст кардани сатҳи камбизоатӣ дар ҶТ дар мувофиқа  бо Вазорати меҳнат ва ҳифзи иҷтимоии аҳолӣ доир гардид.    Дар кори конфронс олимону коршиносони варзидаи соҳаи иқтисодиёти ҷумҳурӣ, мутахассисон, намояндагони вазорату идораҳои гуногун, ташкилоти байналмилалӣ ва ғайридавлатӣ , ки  ба масъалаҳои муносибатҳои меҳнатӣ ва рушди иҷтимоӣ машғул мебошанд, ширкат доранд.    Дар ҳамоиши илмию амалӣ проблемаҳои рушди иҷтимоӣ, муносибатҳои меҳнатӣ,      танзими содироти муҳоҷирати меҳнатӣ, баланд бардоштани савияи дониши хонандагон дар макотиби таълимоти умумӣ ва олӣ, масъалаи бозори меҳнат, шуғли аҳолӣ ва омода намудани мутахассисони бозоргир тибқи талаботи рӯз баррасӣ   мешаванд. Дар ҷаласаи пагоҳирӯзии конфронс иқтисодшиноси маъруф Ҳоҷимуҳаммад Умаров, Г.В Кошлаков, Х. Ғафуров, муовини аввали вазири меҳнат  Э.Н. Сангинов, директори Пажӯҳишгоҳи меҳнат ва ҳифзи иҷтимоӣ С.Ҷ. Комилов оид ба даҳҳо проблемаҳои иқтисодию иҷтимоӣ ва маънавии ҷомеа суханронӣ намуданд.