БАЙНИ ТОҶИКИСТОНУ ИНДОНЕЗИЯ ГУРӮҲИ ДӮСТӢ ТАШКИЛ КАРДА МЕШАВАД

Душанбе, 12 октябр.(АМИТ «Ховар», Марзия Саидова).-«Имрӯз фурсати он расидааст, ки байни Маҷлиси намояндагони Маҷлиси Олии Ҷумҳурии Тоҷикистон ва парлумони Ҷумҳурии Индонезия гурӯҳҳои дӯстӣ таъсис дода шаванд», гуфт зимни мулоқоташ  Раиси палатаи поёнии парлумони Тоҷикистон Шукурҷон Зуҳуров бо роҳбари ҳайати парлумонии Индонезия Муҳаммад Росийд Ҳидоят. Дар мулоқот,  ҳамчунин, таъкид гардид ки боздиди ҳайатҳои  парлумонии Тоҷикистону Индонезия аз кишварҳои ҳамдигар бояд ба ҳукми анъана дарояд, зеро шиносоии ҳайатҳои парлумонӣ бо фаъолияти ҳамкасбони худ дар мавриди таҳия ва қабули санадҳои муҳими аҳамияти дохиливу байналмилалидошта мусоидат менамояд. Мусоҳибон зимни баррасии сатҳи ҳамкориҳои  иқтисодиву тиҷоратии Тоҷикистону Индонезия афзуданд, ки  ҳамкориҳо ҷавобгӯи  имконият ва потенсиали мавҷуда нестанд. Баъд аз анҷоми мулоқот ҳайати парлумонии Индонезия аз китобхона  ва толору маҷлисгоҳҳои Маҷлиси Олии Ҷумҳурии Тоҷикистон дидан карданд.